Mr Robinson
Seisoen 1 SABC3 (*193) 20:30 Komedie
Die skerpskertser Craig Robinson is die ou wat jy al in talle flieks en reekse gesien het. Jy herken sy gesig, maar weet nie wat sy naam is nie. Hy was Ray in die dramareeks Mr Robot (2015-2019), Doug Judy in die polisiekomedie Brooklyn Nine-Nine (2014-nou) en Darryl in die VSA se weergawe van The Office (20052013). Craig toon in die enkelseisoensitkom Mr Robinson (2015) een van sy ander vaardighede. “Ek is ’n opgeleide musiekonnie, soos my karakter,” sê die 48-jarige ster. “Ek is dol oor musiek en speel so dikwels moontlik. Ek is beter met komedie, maar mal oor musiek.”
1 Craig het die klavier leer bespeel terwyl hy die orrel in die kerk in Chicago bespeel het. Hy het sy graad in musiek in 1994 aan die Universiteit van Illinois verwerf, en sy meestersgraad in opvoeding in 1998 by Saint Xavier.
2 Hy maak nou grappe daaroor, maar Craig het gewoonlik ingedut wanneer hy by die Benjamin Franklin Elementary-skool in Indiana klasgegee het. “Ek het bedags gewerk en saans komedie gedoen. ’n Man moet mos sy skoonheidslapie inkry,” sê hy.
3 Craig se jonger broer, Chris, is ’n musiekonnie en musikant. Hy het sy vierde album Sound Of Da Struggle in 2016 uitgereik. Hulle speel in jazz-klubs wanneer hulle in dieselfde stad is.
4 Hy het troetelskilpaaie en -seeskilpaaie, wat sy grootste hartseer is wanneer hy toer en hulle agterlaat. “Ek voel skuldig en moet ekstra snoephappies vir hulle los om te gaan toer,” sê hy.
5 Craig se grootste blaps was om op ’n mediatoer te probeer Duits praat. Pleks van: “Hoe gaan dit?”, het hy gesê: “Ek het my vrou vermoor.”