The Last Igloo
Spesiale program BBC Earth (*184) 20:00 Dokkie
Die dokkie, wat so lank is soos ’n fliek, The Last Igloo is soos niks wat jy al gesien het nie. En dis nie ’n oordrywing nie – die 2019-dokkie verken die geheime lewe van ’n Eskimo-jagter Julius in die middel van die ysige wildernis. Joe Evans, die uitvoerende vervaardiger, sê: “Dit is hipnoties, stadig, maar leersaam wanneer die dokkie die lewe verken van ’n alleenloper wat ’n igloe bou.”
Die verfilming van Julius in die ysige noorde van Oos- Groenland het uiteraard uitdagings gebring. Die temperatuur van benede vriespunt het groot eise aan die kameratoerusting gestel. “Een van ons hommeltuie het feitlik onmiddellik gebreek,” vertel Christian Collerton, die regisseur. “En ’n hoëdefinisie-kamera het kort daarna die gees gegee. Dis net te koud.”
Ironies genoeg, hitte was ook ’n probleem – aardverwarming het veroorsaak dat see-ys nie gevorm word nie en dit is die hoofbousteen van ’n igloe. Die yshuise raak ál skaarser namate die vriesweer elke winter korter word, en Groenland se ysplaat verdwyn nou vier keer vinniger as in 2003. “Hierdie streke – Groenland en die Pole – verwarm twee keer vinniger as die res van die wêreld en spoedig gaan die hulpbronne te min wees om igloes te bou,” sê Chris.
Maar hoewel Julius steeds sy mense se gebruike handhaaf wat deur geslagte heen oorgelewer is, is hy ’n moderne man, wat die tradisionele Eskimodrag, soos elk-huide, vir die gewilde windjekker verruil het. “Pyprook is nie nuut vir my mense nie, ons doen dit al geslagte lank. Maar as ek eerlik moet wees, ek verkies moderne pype met tradisionele tabak,” sê Julius.