Sien is glo
Hoe vreemder die verhaal is, hoe groter is die kans dat dit waar is – Showmax en kie. gaan jou laat kopkrap.
Is jy moeg van dokkies wat vaktaal gebruik om konsepte te verduidelik wat jy nooit sal verstaan nie? Gaan loer ’n bietjie op Showmax (en ander stroomplatforms) en kettingkyk dié dokkies wat raar maar waar is.
McMILLION$ (2019, SHOWMAX)
In dié ses episodes word gesoek na die vermiste $24 miljoen (R348 miljoen) prysgeld in die McDonald’s Monopolyspeletjie. Dis nie ’n sake-monopolie nie, maar die bordspeletjie. Elke artikel op die kitskosplek se opsielys het ’n meegaande simbool gehad wat op ’n McDonald’s Monopoly-bord gebruik kon word. Met ’n spesifieke kombinasie kon jy ’n prys wen. ’n Spul boewe wat deur die voedselreus gekontrakteer is om die speletjie te administreer, het egter in die geheim die belangrikste simbole in hul sak gesteek. En omdat hulle in beheer was, was niemand – vanaf die klante tot McDonald’s se grootbase – daarvan bewus dat nie ’n enkele wenner wat pryse, soos motors en die $1 miljoen, geëis het, wettig was nie.
THREE IDENTICAL STRANGERS (2018, SHOWMAX)
’n Identiese drieling is in ’n eksperiment by geboorte geskei en deur verskillende gesinne aangeneem. Terwyl die seuns grootgeword het, is hulle in die geheim gemonitor. Hulle het op 18-jarige ouderdom per ongeluk van mekaar te hore gekom. Bobby het ’n gemeenskapskollege in New York bygewoon en kon nie verstaan waarom almal hom “Eddie” noem nie. Een van sy broers was by dieselfde kollege! En toe die storie die hoofopskrifte haal, was David, die derde broer, stomgeslaan – hy het twee broers gehad. Die dokkie het filmmateriaal van die seuns in hul grootwordjare en onderhoude. Hoe meer die drie gedelf het, hoe meer het hulle van hul verlede gehoor. Die aanneemouers is ver tel dis moeilik om een gesin te kry wat ’n drieling wou aanneem. Hulle het nooit geweet die seuns was deel van ’n eksperiment nie.
204: GETTING AWAY WITH MURDER (2014, SHOWMAX)
In 2005 het die moord op Brett Kebble, die mynbaas met politieke bande, die hoofopskrifte gehaal. Wat gelyk het soos ’n eenvoudige, gewapende kaping in Johannesburg wat skeefgeloop het, was eintlik ’n misdaad wat so goed beplan is, dit sou perfek in Hollywood se draaiboeke pas. Brett is betrek by alles van geldverduistering, die omkoop van polisiekommissaris Jackie Selebi, miljarde aandele van maatskappye wat verdwyn het, huurmoordenaars tot dwelms. Sy moord is na bewering deur homself georkestreer. Hy het drie misdadige vriende ingesleep, hulle het die aanval beplan en uitgevoer. Om met die moord weg te kom, het die moordenaars staatsgetuies geword en beweer dit was ondersteunde selfdood.
THE CASE AGAINST ADNAN SYED (2019, SHOWMAX)
Dié dokkie is die vervolg op die potgooireeks in 2014 oor die verhaal van
die gevonnisde Adnan Syed. Hy is in 1999 skuldig bevind aan die moord op sy voormalige meisie Hae Min Lee, wat verwurg is. Die probleem is hy is nie eintlik opgesluit vir fisieke bewyse soos vingerafdrukke nie. ’n Paar kennisse van Hae het beweer hulle het haar kort voor haar verdwyning saam met Adnan gesien, terwyl “akkurate tenologiese bewyse” niks meer as ’n paar onakkurate selfoonseine was nie. Adnan is steeds opgesluit terwyl die VSA hooggeregshof sy saak hersien.
TIGER KING: MURDER, MAYHEM & MADNESS (2020, NETFLIX)
Die mense betrokke is so dol soos die karakters in die fantasie-sci-fi-flieks. Ondersoek word ingestel na die handel in leeus, tiers, poemas, en nog meer, reg oor die VSA. Nie net die onderduimse transaksies en hoe die diere verhandel word maak die program nie, maar ook hoe die “versamelaars” en bewaringsgesindes oorlog teen mekaar verklaar het. Joe Exotic onthul hoe hy koppe gestamp het met ’n bewaringsgesinde genaamd Carole Baskin en hoe sy haar man vermoor het, asook Joe se huwelik met drie mans en hoe hy iemand gehuur het om Carole te vermoor.
SHIRKERS (2018, NETFLIX)
Dié fliekdokkie is intens. Dit gaan jou ongemaklik laat voel, en jy gaan wonder hoe kan iemand net spoorloos verdwyn. Dis die verhaal van Sandi Tan, wat in 1992 in Singapoer ’n onafhanklike reisfliek met twee vriende gemaak het. Hulle was onder die voogdyskap van ’n regisseur genaamd Georges Cardona. Nadat die verfilming afgehandel was, het Georges met hul fliek en filmmateriaal verdwyn met geen waarneembare rede vir sy verdwyning nie. Iets onverklaarbaars het gebeur. Byna 20 jaar later het Sandi ’n oproep van Georges se weduwee gekry. Sy het onthul sy het die filmmateriaal, maar dit was onvolledig – die klankbaan was weg. Weet iemand dalk waarom? Want Sandi het nou nog geen idee nie.
KILLER INSIDE: THE MIND OF AARON HERNANDEZ (2020, NETFLIX)
Die NFL-ster Aaron Hernandez het alles gehad – familie, vriende en ’n kontrak van ’n multimiljoen dollar. Hy was ook geestelik onstabiel. ’n Moordsaak in 2013 was wêreldnuus toe leidrade die sportster met ’n reeks moorde verbind het: Hy het die moordvoertuig in sy naam gehuur, sy vingerafdrukke was op die misdaadtoneel en hy het vergeet om die koeëldoppies op te tel. Was die sportman werklik so dom? Aaron het gely aan ’n chroniese breinafwyking (CTE) weens ’n kopbesering wat hy in die sport opgedoen het. Hy het gevolglik nie besef sy optrede is onwettig nie. Ongelukkig is dié diagnose eers ná sy selfdood in 2017 gemaak.
SCREWBALL (2019, NETFLIX)
Bofbal is ’n multimiljard dollar-sport.
Dit sluit in borgskappe, TV-kyksyfers, en aanhangers reg oor die wêreld wat supersterre bewonder. En dekades lank word dit geteister deur dwelm- en steroïedmisbruik. Wat gebeur wanneer die man wat agter alles sit ’n bekentenis maak? Anthony Bosch onthul hoe hy gevorder het van die bestuur van die Miami-teenverouderingskliniek, BioGenesis, tot die verkoop van sportopkikkers aan die grootste bofbalsterre.
FYRE: THE GREATEST PARTY THAT NEVER HAPPENED (2019, NETFLIX)
Die Fyre Festival was in 2017 in die nuus weens al die glanssterre wat daarmee verbind is – vanaf die Kardashians tot kletsrymers en flieksterre. Maar dit was ’n groot leuen. Wat as ’n werklike partytjie begin het, het ’n geldput geword. En al het die organiseerders geweet dit gaan ’n flop wees, het hulle steeds besprekings aanvaar, geadverteer en mense na die feesterrein laat gaan, net om te ontdek daar’s geen sterre, tente, beddens, verhoë of musiek nie. Die base ontken steeds dit was bedrog.