Hamilton los Beatrice vir sy eksvrou, Olivia Kim Cloete vertel van haar sosopkombuise en ware liefde
Kim Cloete vergeet nie haar wortels nie.
Die aktrise Kim Cloete (40) sê sy identifiseer goed met haar karakter, Olivia, in Arendslvei (2018nou). “Olivia is diep gewortel, eerlik en kwesbaar, en sy is lief vir mense, kos en kulture. Nadat Olivia se kind gesterf het, is sy en haar man Hamilton (Kevin Smith) geskei, en hy het vir almal vertel sy het in ’n ongeluk gesterf. Sy gaan deur diep waters en moet haar demone konfronteer.”
KIM SE KARAKTERS
Kim het al talle sterk vrouekarakters gespeel, soos Bronwyn (2015 tot 2018) in die sepie Binnelanders (2005-nou), Bianca van 2005 tot 2010 in Isidingo (19982020), toe sy ook gespeel het saam met Kevin Smith, wat Frank Xavier was.
Maar hoe kies sy ’n rol? “Die belangrikste maatstaf vir my is ek moet presies weet wie die karakter is en of ek genoeg ruimte het om haar eerlik te vertolk. Wanneer vervaardigers jou nader om ’n rol te speel moet hulle immers jou werk ken en weet waartoe jy in staat is. En dan moet ek net die hele organiese proses vertrou en my allerbeste lewer. Dit is ook belangrik om ’n goeie rapport met die regisseur te hê.”
KIM EN KORONA
Met die uitbreek van die koronavirus, wou Kim “iets doen wat werklik betekenisvol is en ’n verskil maak”. “Ek wou help om die lewe makliker te maak vir mense wat in hierdie tyd baie swaarder kry en honger ly. Maar ek het nie geweet hoe en waar om te begin nie en wou nie by burokrasie of rompslomp betrokke raak om my deel te doen nie.”
Dit was haar ma, Angie, in Bonteheu-wel in die Kaap, wat vir haar ’n idee gegee het hoe sy betrokke kon raak.
“My ma is ’n engel en wil almal help. Toe ek haar bel kort nadat die koronavirus uitgebreek het, was sy besig om ’n groot pot sop te kook om honger kinders in die omgewing te voed. Ek kry toe ’n blink idee om mikrokombuise te begin. Ek het vir my ma geld gestuur en gevra sy moet ’n paar potte sop kook.”
Kim het ’n kennisgewing op die sosiale media geplaas waarin sy gevra het wie bereid is om hul kombuise in mikrokombuise te omskep en kon help om haar voedingsprojek te finansier.
“Ek is so dankbaar, want vrywilligers het dadelik hul hart en hande oopgemaak en ons het binne ’n paar dae sewe mikro-kombuise aan die gang gekry.” Daar’s nou reeds agt mikrokombuise in onder meer Bonteheuwel, Elsiesrivier, Khayelitsha en Eldoradopark wat by hierdie voedingskema baat vind.
Kim is die middelman tussen die voeders, of die warriors, soos sy die projek noem, en die finansiers. “Ek gee vir die finansiers terugvoering en bewyse van presies waar hul geld aangewend word en hoeveel monde daarmee gevoed is.”
LIEFDE
Die man wat Kim tans gelukkig maak, is Murray Todd (Invictus, 2009 en Black Sails 2014). “Ons gun mekaar om onsself te wees, gee mekaar die nodige ruimte, maar skep ook vir ons genoeg gehaltekoestertyd saam,” sê sy oor die liefde. “Murray laat my lag en vice versa. Soms maak ons mekaar skrik soos wat kinders doen.”
Maar die liefde het hulle nie sommer oornag bekruip nie. Sy en Murray het mekaar reeds langer as ’n dekade geken voor hulle begin uitgaan het. Hulle het in 2018 verloof geraak en sou in September trou, maar die troudatum is vanweë die koronavirus uitgestel.
Terug by haar karakter, Olivia, in Arendsvlei lyk dit of die liefde tussen Olivia en haar eks, Hamilton, weer blom nadat hy sy meisie, Beatrice (Jolene Martin), twee dae voor die troue soos ’n warm patat gelos het. Maar tyd sal leer of Olivia nou, soos Kim, ware liefde gevind het en ook die strop om die nek gaan kry.
NOG FEITE OOR KIM
Kim het van 1998 tot 1999 rekeningkunde gestudeer.
Sy het ’n verhoogstuk, Ausi Ama, geskryf wat 500 jaar se geskiedenis dek. Dis in 2016 by die Kasteel in Kaapstad opgevoer. “Ek wou almal van die Nguni tot die San ’n stem in hierdie storie gee. Dit is een van my projekte in my loopbaan waarop ek die trotste is.”
Sy het al reekse soos DKNT (20022005) en Zing! (2003 en 2004) aangebied. Sedert verlede jaar is sy medeaanbieder van Nisboere (2017-nou).
Sy en Clint Brink, wat destyds haar man, Steve, in Binnelanders was (lees meer op ble. 30-31), en die skrywer Ricardo Arendse (Love & Kwaito, 2016) het ’n komediereeks geskryf wat in die nabye toekoms vervaardig gaan word.