Oud-Mnr. SA, Cliff Simon, soek na antwoorde in sy reeks
Cliff Simon het sepies vir Uncharted Mysteries verruil om antwoorde te soek op paranormale verskynsels in Amerika.
Net ’n dapper man sal die moed hê om die paranormale en onverklaarbare wêreld te pak. En Cliff Simon is daai man! Die Suid-Afrikaans gebore akteur is die aanbieder van die sci-fi- dokkiereeks Unchar ted Mysteries – Donderdae op History Channel (*186) om 20:15. Hy is bekend vir sy rol as Mitch in Egoli (1992-1997) en is ook ’n voormalige Mnr. SA (1992). “Ek is in die regte stadium van my loopbaan vir dié soort program,” sê die 57-jarige Cliff, wat sedert 2000 in Los Angeles woon. “Ek wou nog altyd ’n oorlewingsprogram maak, en Uncharted Mysteries is daardie program!”
In die ses episodes reis Cliff reg oor Amerika, vanaf New Jersey in die ooste tot by Louisiana in die suide, tot by die Mojave-woestyn in die weste . . . en oor die see na die tropiese Hawaii. “Ek geniet dit gate uit,” sê die aanbieder. “Hulle bel en sê: ‘Jy gaan hierheen,’ dan gaan ek. Ek het soveel pret gehad met die verkenning, asook om antwoorde op dié geheimenisse te vind.”
Hoe is die program saamgestel?
Sowat vyf jaar gelede het, Robin en Laura Keats ’n program Pitbulls & Parolees (2009nou) vervaardig. Ek het gewerk met pitbulls wat gered is, en Laura het my genader om ’n soort hondereddingsprogram te maak, maar daar het niks van gekom nie. Robin het my daarna gevra vir ’n program genaamd Altered States, die oorspronklike titel van dié program. Ek het ’n militêre agtergrond en wil in die buitelewe wees. Ek het van die idee gehou en Robin het vier jaar lank daaraan gewerk.
Watter storie het jou die meeste aangegryp?
Hawaii, en nie net omdat dit episode 1 (op 4 Junie) was nie. Om mense soos Keli’i-okalani Makua, die tatoe-priester, te ontmoet . . . hulle is wonderlike mense en geestelik. Ek het van Hawaii se geskiedenis geleer. Ek is reeds jare lank ’n Amerikaanse burger en meen wat met dié mense gebeur het, was onregverdig. Die Hawaiërs is vervolg, van hul grond verdryf en nie as mense beskou nie. Ek en Keli’i het ure lank gesels, hy wou weet watter soort mens ek was om vir my ’n tatoe te skep. Dit het nie van my afgehang wat hy op my lyf wou sit nie. Dit was sy besluit.
Hoe groot is jou betrokkenheid agter die skerms?
Dis ’n klein span. Kameramanne, die regisseur, die klankman en ek. Dis ’n samewerking tussen my en Michael Sheehan, die regisseur. Hy laat my toe om dit te doen waarmee ek gemaklik is, maar doen steeds die regie. Ek het wel ’n sê, want ek wil nie my lewe waag nie. Soms sê ek: “Luister, dis te erg vir my. Ek hou van die program. Ek hou daarvan om waaghalsig te wees. Maar ek gaan beslis nie vir die program sterf nie.”
Dis nie soos in ’n teaterproduksie waar mense in die ateljee jou voorsê wat om moet te doen nie. Ons is baie losser. Wanneer ek teen ’n heuwel uithardloop, hardloop die kameramanne saam.
Watter soort program is jou gunsteling?
Enigiets wat met forensiese ontleding te doen het. Ons soek na voetspore, haarmonsters, ensovoorts. Ek is ’n navorser, my program is om paranormale aktiwiteit na te vors en met getuies, wat dié goed gesien het, te praat. Ek hou ook van iets soos die realiteitsprogram Expedition Unknown (2015-nou) met ’n erkende beroepskenner aan die stuur. Josh Gates, die aanbieder van Expedition Unknown, is ’n regte argeoloog, hy wys jou dus akkurate inhoud wat jy weet is outentiek en nie gedramatiseer nie.
En jy praat steeds met jou SA aksent . . .
Wanneer jy volwasse is, verloor jy nie jou aksent nie. Ek moes aan ’n Amerikaanse aksent werk. Soms moet jy die rol van ’n Rus of Israeli speel en met hul aksent praat. Die programme hou van die Suid-Afrikaanse aksent en dit werk vir talle karakters. Franz Marx, die skepper van Egoli (1992-2010), het een keer aan my gesê: “Gebruik jou aksent. Jy staan daar buite teen 100 000 ander wat nie jou stem het nie.”