DítKykOnsNou
Naam: Genevieve Terblanche
Pos: Senior skrywer, ’n vrye, eties gefundeerde idioot.
Hou van: Beste vriende wat simpel goed saam doen. Hou nie van: Natuur-“dokkies” wat slegs op die wêreld se dodelikste diere fokus nie. Wat ’n vreemde, heerssugtige manier om na die lewe te kyk.
Ek kyk nou: Run (2020), seisoen 1, op Showmax.
My mening oor die reeks: Die studentevriende Ruby en Billy (Merritt Wever en Domhnall Gleeson) het 17 jaar gelede ’n ooreenkoms aangegaan dat wanneer een die ander ’n teksboodskap met die woord run stuur, moet hulle alles los en saam wegloop. Maar hul treinrit, wat soos ’n romkom begin, ontwikkel donker temas weens afpersing, ’n toevallige dood en verpletterende verraad. Billy en Ruby is so warm, so ondeund en het soveel vonk, hulle trek jou in voor die uitklophou. My gunsteling-oomblik: In episode 5 vind ons uit waarom Billy werklik vir Ruby die run
SMS gestuur het. Dit het my oë oopgemaak. Maar ’n sterk mededinger is episode 2 se reeks rampspoedige gebeure in ’n volgepakte treinwa. Hoekom kyk ek dit nou? Nadat ek dit sowat ’n maand gelede nagevors het, het ek genoeg tyd gehad om die sewe episodes van sowat 30 minute elk te kyk. Boonop is die uitmuntende Phoebe Waller-Bridge een van die uitvoerende vervaardigers. Naam: Lucia Poolman Pos: Redaktrise met termiese sokkies aan.
Hou van: Enigiets van slapstick tot hoogdrama en sci-fi (ek is immers ’n TV-redakteur).
Hou nie van: The Kelly Clarkson Show, seisoen 1, weekdae op M-Net (*101) om 16:50 nie. Om een of ander rede werk die program nie vir my nie.
Ek kyk nou: Die rillerdrama How To Get Away With Murder (2014-2020) op Netflix.
My mening oor die reeks: Vol kinkels! Elke episode eindig met “net nog een”. ’n Groep regstudente leer letterlik van hul professor, die gesaghebbende prokureur Annelise Keating (Viola Davis), hoe om met moord weg te kom. Die toneelspel is briljant, die storielyn spannend. En dit wys ’n kant van die mens waarmee almal kan vereenselwig. Tot watter uiterstes sal jy vir jouself en jou geliefdes gaan?
My gunsteling-oomblik: Die einde van seisoen 1 se episode 4, wanneer Annelise haar grimering verwyder. Dis ’n fantastiese, metaforiese toneel. En in die daaropvolgende episodes wanneer haar ma, Ophelia (Cicely Tyson), haar kom help. Al is Ophelia so klein, dwing sy respek af! Hoekom kyk ek dit nou? Ek was dol oor seisoen 1, maar het verlore geraak in ’n vloedgolf programme êrens rondom seisoen 3. Ek sien nou soveel nuanses wat ek nie die eerste keer opgelet het nie.
Naam: Elri Boucher
Pos: ’n Joernalis met ’n liefde vir Afrikaans wat probeer om volgens die nuwe normaal te lewe.
Hou van: Fantasie, sport, musiekblyspele, dokkies en donker humor. En sommige flieks wat jou goed laat voel, soos The
Half Of It (2020) op Netflix.
Hou nie van: 90 Day Fiancé (2014-nou) nie. Jammer, Ipeleng, my vriendin en kollega . . . dié reeks vul my met weersin. Hopeloos te veel drama!
Ek kyk nou: The Last Dance (2020), seisoen 1, op Netflix.
My mening oor die reeks: Ek het niks van basketbal af geweet nie, maar nou is ek ’n vurige aanhanger! Michael Jordan is steeds ’n basketballegende. Sy vaardigheid en talent in dié sportdokkie oor die Chicago Bulls-span se pad na sy sesde NBA (The National Basketball Association)-kampioenskapstitel in 1998 is fenomenaal. Daar is ook bydraes van ander basketbalhelde, soos Magic Johnson, Scottie Pippen en die omstrede hofmakery, en die vreemde Dennis Rodman. My gunsteling-oomblik: Dis sonder twyfel die oomblik in die eindronde in episode 10 toe Michael in 1998 die wendoel vir die Bulls geskiet het. Hoekom kyk ek dit nou? Ek is steeds sportmal al was daar geen regstreekste sportuitsendings op die SuperSport-kanale op DStv beskikbaar nie. Maar ek is beïndruk deur die sportdokkies op Netflix. Dis vermaaklik en van ’n hoë gehalte.
Naam: Ipeleng Rakgantsho
Pos: ’n Skrywer wat alles terugtrek wat sy oor daai TikTokdansuitdagingvideo’s gesê het. Hulle is toe nie so sleg nie.
Hou van: The Real Housewivesfranchise (2006-nou) is werklik ’n onuitputlike bron van genot. Ek’s beskikbaar vir hul opregte vriendskappe en vakansiekonfrontasies. Hou nie van: Stoei nie! Die oorreaksies, oordrewe storielye – dis nie vir my nie.
Ek kyk nou: Being Mary Jane (2013-2019), seisoen 1, op Showmax. My mening oor die reeks: Ondanks haar suksesvolle loopbaan, pragtige huis en droomklerekas, verwyt die nuusaanbieder Mary Jane Paul (Gabrielle Union) steeds haarself omdat sy nie getroud is nie. Sy is so bang vir alleenwees dat sy nie kan wegkom van die smerige affair met die getroude Andre (Omari Hardwick) nie. Ek hou daarvan dat Mary Jane nie die tipiese protagonis is nie. Sy het elke denkbare fout, maar sy leer uit haar foute teen die einde van seisoen 1, sy sê Andre af en vra sy vrou om verskoning.
My gunsteling-oomblik: Wanneer MJ ’n teken van Bo vra om uit te vind of Andre “die een” is. Sy trap daarna op sy trouring terwyl sy sy klere van die vloer af optel. Dít was dié oomblik. Hoekom kyk ek dit nou? Dis een van my gunsteling-programme. Ek kyk dit weer wanneer daar niks interessants op TV is nie. Naam: Emile Butler-O’Brien Pos: Senior joernalis met engtevrees en ’n onttrekkingsindroom.
Hou van: Sci-fi-soektogte, goedkoop dramas wat effens oordrewe is (en dalk prullerig) en die kosreeks Diners, Drive-ins And Dives (2006-nou). Hou nie van: Afspraakrealiteitsprogramme, soos Love Island (2015-nou) en Ex On The Beach (2018-nou), nie.
Ek kyk nou: Kingdom, seisoen 1 en 2 (2019-nou), op Netflix.
My mening oor die reeks: Ek was so vasgevang deur dié Suid-Koreaanse zombiereeks, ek was bereid om die onderskrifte te verduur. Kingdom speel af in die 17de eeu in Korea, waar ’n plaag die dooies in vleisvretende zombies verander. Die reeks grawe die gruwel uit en wys die zombies van The Walking Dead (2010-nou) ’n ding of twee. My gunsteling-oomblik: Die zombies! Anders as Hollywood se zombies wat simpel rondslof, hardloop dié zombies en lê mense soms in die lang gras voor. Bedags stapel hulle opmekaar in grillerige, dormante hope en is net snags aktief. Wanneer die zombies wakker word, verwring hulle hulself soos monsters wat van die duiwel besete is. Hoekom kyk ek dit nou? My man, Gareth, kettingkyk reekse deur die nag. Hy was besig met episode 1 toe ek op hom afkom en ons het albei seisoene oor die naweek gekettingkyk.
Naam: Kashief Achmat
Pos: Skeduleerder wat in vlees op vlak 3, maar in gees op vlak 1 van die inperking is.
Hou van: Kookprogramme is ’n fantastiese manier wanneer jy die tyd wil omkry – en gee jou idees vir laataandversnaperings.
Hou nie van: Slegte superheldprogramme nie. Wanneer jy programme maak wat maar blegh is weens ’n klein begroting, verloor ’n mens belangstelling sodra die swak spesiale effekte begin.
Ek kyk nou: The Great British Bake Off (2010-nou), seisoen 10, Maandae op BBC Lifestyle (*174) om 20:00 en op DStv Catch Up.
My mening oor die reeks: The Great British Bake Off is loshande die lekkerste program op TV. Daar is twee gawe beoordelaars (Prue en Paul) en twee selfs gawer aanbieders (Noel en Sandi) wat amateurbakkers help en aanmoedig om wonderwerke in die tent te skep. Ek is verbysterd dat hulle fyngebak binne ’n uur kan maak, terwyl ek 10 minute nodig het om two-minutenoodles te maak.
My gunsteling-oomblik: Enige episode waarin hulle die beoordelaar Prue Leith se resepte in die blinde toets moet bak. Moenie toelaat dat haar grasieuse styl en innemendheid jou bluf nie: Haar resepte is moeiliker as wat jy dink.
Hoekom kyk ek dit nou? Ek het onlangs ophou vas en dit gaan my deur die maand help en nuwe bakidees gee. Naam: Tumi Kunene
Pos: Senior ontwerper, wat dié winter klere vir haweloses bymekaar maak.
Hou van: Drama, enigiets wat met medisyne te doen het en ’n bietjie aksie.
Hou nie van: Dokkies nie.
Ek kyk nou: Die dramareeks A Million Little Things (2018-nou), seisoen 1, op Showmax.
My mening oor die reeks: Ek kuier nie graag saam met ’n klomp vriende nie. Maar om te sien hoe vier mans se vriendskap hul gesinne in ’n groter familie transformeer, laat my my siening verander. Ek blameer die #Inperking #Sosialedistansiëring. Dié program handel ook oor siektes soos kanker en depressie. En kan ons om iemand te verkul ook as ’n siekte beskou?
My gunsteling-oomblik: Wanneer Rome (Romany Malco), Eddie (David Giuntoli) en Gary (James Roday) saamkom om hul vriend Jon Dixon (Ron Livingston) se gesin te help om ’n Kersboom op te rig nadat Jon in die eerste episode sy eie lewe geneem het. Dan is daar Gary se ondersteuning aan sy meisie, Maggie (Allison Miller), wat teen borskanker stry, en die vaderkind-verhouding tussen Eddie en sy seun, Theo (Tristan Byon).
Hoekom kyk ek dit nou? Ek het iets gesoek om my gedagtes af a te lei en dít was die regte ding. Dis ’n binnekykie in die reëls vir mans. Ek het ook gesien Grace Park (off. Kono Kalakaua in Hawaii Five-0, 2010-2020) speel daarin.