Skop, skiet & donner
Showmax spuit ’n bietjie adrenalien in jou kykstof met sy lys aksiehelde en -flieks.
Wil jy ’n bietjie wegbreek van die kindervermaak, want jy sal nie nóg ’n keer die SpongeBob SquarePants-liedjie ná die miljoenste keer kan verdra nie (lees meer op bl. 12)? Skuif reg vir iets met meer aksie. Die plaaslike stroomplatform Showmax is gelaai met genoeg aksiekykstof om jou lewenslank te vermaak, of dit soldate is wat hul pos in ’n oorloggeteisterde land moet verdedig, ’n pa wat die moord op sy kind wil wreek, of ’n span geheime agente wat uit wolkekrabbers spring terwyl hulle ’n internasionale wapentransaksie stuit!
ONCE UPON A TIME IN MEXICO (2003)
So baie bekende gesigte, so baie vuishoue, politieke leuens en koeëls. Antonio Banderas (Pablo Picasso in die biografiese dramareeks van 2018, Genius) speel “The Mariachi”, ’n musikant-huurmoordenaar wat deur ’n twyfelagtige CIA-agent (Johnny Depp, Jack Sparrow in die Pirates Of The Caribbean-flieks, 2003-nou) gehuur word om betrokke te raak by die sluipmoordaanslag op Mexiko se nuwe president. Maar El Mariachi gaan ontdek daar is vir hom gelieg en sy nuwe baas laat hom skuldig lyk aan moord. Wat moet ’n verwoede huurmoordenaar doen wanneer sy vertroue en eer geskend word? Maak jag op die skuldige ou en hou uit wraak ’n vuurwapen teen sy kop.
COLD PURSUIT (2019)
Liam Neeson (Bryan Mills in die Takenfliekfranchise, 2008-2014) is op sy gemeenste as die sneeuskraper-drywer Nelson Coxman. Nelson is nie kwaad omdat iemand in die middel van die Kerstyd sy bande afgeblaas het en hy nie paaie kan oopskraap sodat die verkeer makliker kan vloei nie – hy wil die dwelmbaas vind wat sy seun vermoor het, hom martel en doodmaak. Nelson se enigste leidraad is die man noem homself “Viking”.
RAMBO: LAST BLOOD (2019)
Bind daai ikoniese kopband vas, olie jou pyl en boog, en staan gereed wanneer Sylvester Stallone (die bokser
Rocky Balboa in die Rocky-fliekfranchise, 1976-nou) sy bekendste karakter nog een keer laat herleef. Die oudseesoldaat en oorloglegende John Rambo gaan na Mexiko om na sy ontvoerde niggie en regverdiging vir sy misdaad as ’n VSA soldaat te soek. Dis donker en dapper, en om te sien hoe die slegte ouens ’n pak slae kry, is hoogs vermaaklik. Dit is die enigste Rambo-fliek waarin hy nie sy kopband dra nie.
SLEEPLESS (2017)
Jamie Fox (die aanbieder van die musiekspeletjieprogram Beat Shazam, 2017-nou) is wild en woes as Vincent Downs, ’n korrupte Las Vegas-polisieman. Maar hy’s nie die slegte ou nie – bendes het sy seun ontvoer en hulle meen omdat hy die polisiewapen dra en reeds korrup is, sal Vincent nóg ’n paar reëls verbreek om hulle te help indien dit beteken hy kan só sy seun beskerm. Die enigste vangplek is Vince moet die opdragte in een aand uitvoer.
BROKEN CITY (2013)
Mark Wahlberg (homself in die realiteitsprogram Wahlburgers, 2014-2019) speel die oudpolisieman Billy Taggart. Hy soek wraak nadat hy skuldig laat lyk is aan die moord op ’n verkragter, maar sy vyand is die nuwe burgemeester (Russell Crowe, Roger Ailes in die biografiese dramareeks van 2019, The Loudest Voice). Billy moet sy pad oopveg voor hy by die burgemeester kan kom. Net sowel hy is reg vir ’n geveg. Die oudpolisieman Billy soek vergoeding van sy politieke poppespeler.