’n Reeksmoordenaar in jou midde
Vier episodes van dinamiet wag op kykers in die nuwe sielkundige rilreeks.
“Dit was nog altyd vir my ’n sterk sêding – siende blind – so ’n lekker oksimoron,” sê Tertius Kapp (skrywer van die reeks Die Spreeus 2019-nou), die skepper en skrywer van die nuwe sielkundige riller Siende Blind wat einde November op kykNET begin.
“Dit skakel natuurlik baie goed met die werk van ’n profielsamesteller (soos die hoofkarakter in die reeks), wat soms kan voel hul tas in die donker rond op soek na reeksmoordenaars,” voeg hy by. En dis presies wat in Siende Blind gebeur wanneer Lena Schoeman (Liezl de Kock, Bianca in die gruwelfilm Lyfstraf, 2012) besef sy is dalk daagliks in aanraking met ’n reeksmoordenaar . . .
WAAROOR GAAN DIT?
Lena Schoeman is ’n profielsamesteller by die Suid-Afrikaanse Polisiediens en besluit om die inperking weens die Covid-19-pandemie saam met haar gesin by haar skoonma se huis deur te bring. Daar kyk Lena na ou onopgeloste sake, en kom danksy ’n reeks leidrade vinnig agter daar is ’n reeksmoordenaar in haar midde – en hy of sy bly onder dieselfde dak as haar gesin . . .
“Lena leef vir haar werk,” sê Liezl oor haar karakter. “Haar ma was ’n ongelooflike speurder en is tragies deur ’n reeksmoordenaar vermoor. ’n Deel van Lena het ’n profielsamesteller geword sodat sy kan wraak neem vir haar ma se dood.
“Sy het van jongs af besef sy sien die wêreld ’n bietjie anders as die gewone mens. As ’n enigste kind het sy ook baie tyd in haar eie geselskap deurgebring en in haar eie droomwêreld geleef.”
Lena se missie is om sake op te los en sy sal nie rus vir haar siel kry voor sy die reeksmoordenaar op wie sy tans jag maak, vastrek nie – maak nie saak wie hy of sy is nie.
GROOT OPWINDING
Die nuwe skepping uit die pen van Tertius is net vier episodes lank, maar “dis vier episodes van dinamiet wat jy nie kan misloop nie,” sê die akteur
Pietie Beyers (die aanbieder van die vasvraprogram Blitsbrein, 2018-nou) wat die rol van Roelof Schoeman, Lena se man, speel (lees meer in die kassie hiernaas). “Die verfilming van die reeks was werklik uiters opwindend. Die sielkundige raaisel wat geskep word, gaan kykers se aandag prikkel en behou, en jy gaan saam met Lena agter die kap van die byl wil kom.”
DIE INSPIRASIE
Tertius sê hy het die skryfproses aangepak soos wat hy gewoonlik doen:
Deur ure en ure se navorsing te doen. “Ek is versot op reekse soos Mindhunter (2017-nou), waar die prooi se sielkundige samestelling stukkie vir stukkie ontrafel word uit komplekse leidrade, woordkeuses, denkpatrone, en ander spore wat slegs sigbaar is met die regte oë,” sê Tertius. “Die manier waarop byvoorbeeld die Unabomber (Ted Kaczynski, ’n anargis en terroris) gevang is (in 1996 omdat hy bomme gestuur het wat drie mense se lewe geëis het), asook die ondersoek na die Zodiac-moordenaar (wat reeksmoorde in die 1960’s en 1970’s gepleeg het en wie se identiteit steeds onbekend is) was beslis ook ’n inspirasie.”
Tertius het ook van Micki Pistorius, ’n plaaslike forensiese ondersoeker en sielkundige, se werk gebruik om die reeks te vorm. “Micki se werk is gelyk aan die beste ter wêreld, en haar teorie rondom sielkunde en reeksmoorde is fassinerend.”
DIE REEKSMOORDENAAR
Lena doop die reeksmoordenaar Blindemol. “Sy kom agter die persoon was in dieselfde stede as haar skoonma Marinette en haar skoonpa, Ruan
(nie op die skerm nie) terwyl Roelof grootgeword het,” vertel Liezl.
Op Blindemol se moordtonele is ’n embleem gevind van ’n geheime organisasie, die Fakkeldraers, en in ’n skokonthulling kom dit aan die lig Ruan was ’n lid van die organisasie. “Die meisies wat deur Blindemol vermoor is, was almal jonk – in hul vroeë twintigs – en die liggame was op ’n brutale manier uitgestal asof hy ’n boodskap wou agterlaat.” Die besonderhede vang Lena se aandag vas en namate sy meer tyd in Marinette se huis deurbring, kom sy op meer leidrade af wat haar reguit na Blindemol lei. Wie Blindemol is, mag ons nie verklap nie, maar teen episode 4
(15 Desember) sal die karakter se identiteit onthul word “en dit gaan nie net die kykers nie, maar ook vir Lena na haar asem laat snak,” sê Liezl.