NÓG INLIGTING

Die skepper van die reeks, Andrew Sodroski (wat ook Manhunt: Unabomber, die eerste seisoen geregisseer het), wil al jare lank Richard se verhaal vertel. “Daar was nie genoeg inligting vir ’n hele reeks nie. Eers nadat ek Maryanne Voller se 2007-roman Lone Wolf: Eric Rudolph And The Legacy Of American Terror gelees het, het ek besef daar was ’n mensejag-element,” sê Andrew. Eric was tot 2003 op vlug. Vir jare het niemand gehoor van Eric wat in die Appalachiese wildernis weggekruip het nie. “Dís die verhaal dié seisoen,” sê Andrew.

Andrew het toegang tot Maryanne se argiewe verkry en was verstom deur die inligting. “Ek het met tienduisende bladsye dokumente weggestap, elke aspek van die saak is gedek, insluitende Eric se oproepe na die polisie oor sy bom (Eric wou die Spele ruïneer en die VSA regering miljoene dollars uit die sak jaag). Ons het ook toegang tot die FBIonderhoude verkry.” En dit alles is in die spannende draaiboek verwerk.

WÊRELD-WAARSKUWING

Die verhaal van wat met Richard Jewell gebeur het, is ’n waarskuwing vir 2020, verduidelik Andrew, want so baie van die probleme van 1996 gebeur steeds. “Die wêreld van dié verhaal is die wêreld van vals nuus. ’n Selfsugtige Washington-burokrasie wat meer omgee vir die storie as die waarheid, die verhaal van ’n verdeelde Amerika en ’n psigopatiese narsis wat vir eie gewin munt slaan uit ons verdeeldheid. Dis soos die wêreld waarin ons nou leef,” sê Andrew, en mik daarmee ’n dwarsklap na die omstrede uittredende president

Donald Trump.