Kom dans saam
Mira, die koninklike speurder, het die Indiese argitektuur, kultuur, musiek en danse gevind om die jongspan mee te vermaak.
In die geanimeerde reeks van 2020 Mira Royal Detective, stel Shanti die koningin van Jalpur (stem van Freida Pinto, Vera in die 2018-sci-fi-reeks The Path) die slim, oplettende 12-jarige Mira (stem van die 16-jarige Leela Ladnier, Lilly in die 2019-fliekkomedie Boris & The Bomb) as haar amptelike koninklike speurder aan. Nou is Mira daarop ingestel om al die hof se geheimenisse en die kwessies wat haar vriende, familie en bure pla, op te los in die nuwe geanimeerde reeks op Disney Junior (*309) weekdae om 18:00. Dis moeilike werk, maar Mira is knap, het ’n oog vir detail en sy kry hulp van haar twee muishondvriende.
Dié genotvolle, kleurryke avontuurreeks is bedoel vir kinders tussen 2 en 7 jaar. Terwyl hulle die leidrade vir Mira se sake saam met haar verken, gaan hulle baie meer leer. Die reeks is deeglik nagevors en gelaai met besonderhede oor die Indiese kultuur, tradisies en vieringe. Jalpur is ’n fiktiewe stad waarvan die argitektuur beïnvloed is deur die Noord-Indiese staat Rajastan. “Dis ’n hawestad, want ons wou alles van Indië weerspieël,” voeg die uitvoerende vervaardiger, Sascha Palladino (raadgewende vervaardiger vir die geanimeerde reeks Henry Hugglemonster, 2013-2016), by. “Ek sien kinder-TV as ’n geleentheid om kinders aan nuwe asook bekende dinge bloot te stel. Vir Asiatiese kinders in die Suide (soos die Suid-Afrikaanse Indiërgemeenskap), byvoorbeeld, is dit betekenisvol, want hulle sien hulle word op TV verteenwoordig, soms vir die eerste keer, wat iets groots is. En vir nie-Suid-Asiatiese kinders is dit ewe betekenisvol, want hulle was dalk nog nooit blootgestel aan die Suid-Asiatiese kultuur nie. Ons het die geleentheid om wonderlike dinge aan hulle te wys.”
’N SPEURDER SE OOG
Die produksiespan het verseker hulle was respekvol en akkuraat met die samestelling van die reeks, selfs voor ’n enkele woord vir die draaiboek geskryf is. “Ons kulturele raadgewers is belangrik vir elke stap, vanaf die skryf tot die ontwerp, die beelddraaiboek en die choreografie,” sê Sascha. “Ons wou hê alle vlakke van die program moes outentiek wees – die beelde, klere, musiek en dansery. Dit was ons beginsel. ’n Groot deel van my werk was om te luister en seker te maak ons het soveel Suid-Asiatiese stemme moontlik. Ek was soortvan ’n afgevaardigde vir die nie-Suid-Asiatiese kyker, en het gedink hoe kan ons verseker dit is toeganklik vir almal sonder om dit te verwater.
“Ons het met ’n wonderlike mens genaamd Shago [Shagorika Ghosh Perkins, die reeks se kulturele konsultant en raadgewende vervaardiger] gewerk, wat na elkeen van ons draaiboeke en al ons ontwerpe gekyk en terugvoering gegee het. Sy sou sê: ‘Samoesas sal nie by daardie besondere maaltyd geëet word nie’, om watter rede ook al. Of, ‘daardie soort uitrusting is nie heeltemal korrek vir daardie soort geleentheid nie.’ Sy gee voorstelle soos: ‘Julle kan dié soort groet hier insluit.’ Ons maak seker dis deel van die proses,” sê Sascha.
’N LEKKER DANS
Die karakters van Mira Royal Detective kan enige oomblik begin dans. Maar dis nie die animasiespan wat karakters laat dans nie. Hulle werk nou saam met die choreograaf Nakul Dev Mahajan
– die man in beheer van die Bollywoodstylchoreografie vir die realiteitsreeks So You Think You Can Dance?, VSA (20092015). Die toesighoudende regisseur,
Sue Perrotto, bekyk die liedjie waarvoor hulle choreografie deur Nakul benodig. Nakul ontwikkel dan die musiek, die karakter en die storie. Hy en sy assistent Khushy Niazi demonstreer, neem dit op en stuur dit terug aan Sue en haar span. Daarna stel hulle die beelddraaiboek saam van hoe die dans behoort te lyk en stuur dit saam met Nakul se opname na die animasiespan by Technicolor in Indië, wie se kunstenaar hul finale animasie grond op die dans en tekeninge.
“Dans is so ’n groot deel van die Indiërkultuur. Dis feitlik die ruggraat van ons lewe,” sê Nakul. “Dis ’n unieke ervaring om choreografie vir geanimeerde karakters te doen. Ek begin dink aan ander bewegings wat ’n jonger kind sal sien en dalk wil probeer. Daar is so baie soorte Indiese danse. Dit lewer ’n goeie verhaal. Ek hoop die kinders word geïnspireer om te dans, om te beweeg en om van ’n ander kultuur te leer.”