Vervreemding, verlange en droogte
Drie broers en hul pa op soek na vrede.
Nêrens, Noord-Kaap
Seisoen 1 Dinsdae kykNET (*144) 20:00 (begin 31 Augustus)
Drie vervreemde broers, Frans (Geon Nel, Veerman Charon oftewel die Dood van 2017 in Die Boekklub, 2016-2021), Ronnie (Albert Pretorius, Rikus in 2017 Die Boekklub) en Andries (De Klerk Oelofse Lourens van 2017 in Die Boekklub), vind die kronkelpad terug na hul wewenaar-pa Lourens Adendorff (Frank Opperman, Pottie in Die Uwe, Pottie Potgieter,
2010) wat op die familieplaas Nêrens iewers in die droogtegeteisterde NoordKaap woon.
Talle geheime en hartseer – en die waarheid oor hul ma, Katja (Tinarie van Wyk-Loots, Lara in Fynskrif, 2018-2020) se dood – moet ontrafel word, en almal wil weet wat gebeur het.
GEWONE VERHAAL
Nico Scheepers, skepper, mede-regisseur en draaiboekskrywer, sê almal sal met die storie kan identifiseer. “Talle van ons het al verbrokkelende verhoudings gehad, is onvergenoegd en vervreemd van iemand in ons lewe. Ek dink die magic lê baiekeer in die alledaagse en eerlike stories opgesluit. Die storie is ook universeel omdat dit oor menseverhoudinge gaan.”
Nico sê mans weet dikwels nie hoe om met mekaar te praat nie en dit kan tot gebroke verhoudings lei. “Die oorhoofse tema van hierdie dramareeks is: Hoekom hunker ons altyd na die verlede? En hoe beweeg jy vorentoe en begrawe jou verlede as hartseer al is wat jy van iemand oorhou?” voeg hy by.
Nico het self op ’n plaas grootgeword. “Ek wou ’n storie skryf wat gaan oor plaasmense en hoe hulle met die wêreld praat. So baie Suid-Afrikaners woon in stede, maar talle se erfenis lê steeds in grond.” sê hy.
VUURDOOP VIR TELEVISIE
Nêrens, Noord-Kaap was eers ’n teaterproduksie wat in 2017 vol sale getrek en hartsnare geroer het, en Nico het dit vir TV verwerk.
“Verhoog en televisie is twee verskillende mediums. Dit verskil soos verf en musiek maak,” verduidelik hy. “Dit is amper soos om ’n boek in ’n rolprent te verwerk.”
Die hele struktuur van die verhoogstuk verskil hemelsbreed van die TVreeks. “Die verhoogdrama het eintlik uit drie monoloë bestaan, dit is die drie
inner voices van die drie broers. Daar was ook net drie karakters – die broers op die verhoog.
“Vir die TV-reeks moes ek die storiewêrelde van die broers uitbou en talle karakters bywerk, maar hulle moes steeds by dieselfde katarsis uitkom,” vertel hy.
“Dit was ’n ingewikkelde proses en ek was bang omdat ek nog nooit voorheen so ’n uitdaging aangepak het nie, maar uiteindelik was dit net groot pret.”
Die dramareeks strek oor drie geslagte en hy moes dus verskeie nuwe jong akteurs, van wie vier groot rolle vertolk, gebruik. “Ek is baie opgewonde oor die nuwe, jong talent. Sowat 300 seuns het oudisies gedoen. Ons wou uit die staanspoor nie kinders kies wat al voorheen op die verhoog of voor die kamera was nie, want ons wou hê hulle moet baie natuurlik op die skerm oorkom,” sê hy.
Wat die hoofrolle betref, was hy baie in sy noppies dat De Klerk, Albert en Geon – wat ook in die toneelstuk gespeel het – vir die verfilming van die reeks beskikbaar was. “Al drie het hulle al so in hul drie onderskeie karakters op die verhoog ingewortel. As hulle nie beskikbaar was nie, sou dit vir my gevoel soos om nie jou familie op Kersdag te hê nie.
“Ons was ook baie in ons skik om ’n gesoute akteur soos Frank vir die rol van die pa te kry.”