Die dokter is aan diens
The Good Doctor raak dié seisoen persoonlik en sensitief.
The Good Doctor
Seisoen 4 Maandae M-Net (*101) 21:00 (begin 30 Augustus)
Daar is ’n alte bekende gevoel van angs en versmoring wat jou oorval wanneer jy na die loodsepisode van seisoen 4 van die mediese dramareeks The Good Doctor (2017-nou) kyk. Die seisoen begin met ’n kort boodskap wat die noodwerkers huldig en vir die kykers sê: “Doen jou deel. Dra ’n masker.” Dis ’n hartseer en kragtige begin wat jou voorberei vir wat gaan kom. Dr. Shaun Murphy (Freddie Highmore, Norman Bates in die rilreeks Bates Motel, 2013-2017) en die res van die mediese personeel by die San Jose
St. Bonaventure-hospitaal veg teen die Covid-19-pandemie wat die wêreld in ’n ystergreep het, en dit kan nie vermy word nie, selfs nie eens vir die outistiese geleerde dokter nie.
MEER AS NET OUTISME
In dié episode wat emosioneel sy tol op almal eis, is dit moeilik om te sien hoe die byna robotagtige dr. Shuan sy gevoelens gaan uitdruk. Maar Freddie sê sy karakter se ontwikkeling gaan juis daaroor om ook soms dié tipe emosies te wys. Freddie verduidelik Shaun is nie net ’n eendimensionele “persoon met outisme” nie.
“Dikwels word mense met outisme op die skerm uitgebeeld as emosieloos en net op een ding gefokus. En dis nie waar nie. Ons sien Shaun in sy oomblikke van vreugde, opgewondenheid, tesame met die stryd wat hy voer,” sê die 29-jarige akteur.
’N NUWE GRU-GENRE
Wanneer jy sien die karakters in die reeks hoes terwyl mense daar naby staan met geen sosiale distansiëring nie, en nie almal dra maskers nie, verander dit skielik in ’n ander soort kykervaring. Om die waarheid te sê, die onderwerp van die koronavirus in TV-programme kan tans maklik in sy eie gru-genre verander word. En in The Good Doctor word die pandemie in die eerste episode ook nie verdoesel nie. Die reeksbestuurder, David Shore (vervaardiger van die mediese dramareeks House MD, 2004-2012), het geweet wat ookal in die vorige seisoen met die dokters gebeur het, moes agteruit geskuif word, want die virus kon nie geïgnoreer word nie. “Daar was ’n werklikheid in die wêreld wat dié dokters moes hanteer, dus het ons dit uit daardie oogpunt benader – dat hulle die gewig van die vorige seisoen dra, maar hulle kan dit nie uitsorteer voor al die ander goed (die pandemie) nie onder beheer is nie,” vertel hy.
HANTEER DIE NUWE NORMAAL
The Good Doctor is anders as ander mediese dramas, juis omdat dit die verskillende maniere waarop mense met mekaar skakel, verken – en dan kyk hoe die skakeling deur die pandemie geraak is, sê David. “Ek was nog altyd trots daarop dat ek my mediese programme so realisties moontlik probeer maak, maar dit het nog nooit oor die medisyne gegaan nie. Dit gaan oor die mense wat deur die medisyne geraak word,” sê hy.
En dié seisoen is nie anders nie – al die dokters stry teen die virus, asook om hul persoonlike lewe te balanseer. Die kykers moet vasgord wanneer hulle sien dr. Marcus Andrews (Hill Harper, Rob Emmons in die aksiereeks Homeland, 2011-2020) gaan huis toe, maar hy het geen interaksie met sy vrou nie, want hy het dalk die virus weens die lang ure wat hy in sy dubbele dubbelskofte by San Jose werk. Hy eet sy aandete alleen en leef afgesonder van sy gesin.
Shaun se mentor dr. Aaron Glassman (Richard Schiff, Brett Anderson in die komediereeks Ballers, 2015-2019) steier ook weens die virus. Hy voel vasgevang en hulpeloos om van die huis af te werk, en mag nie by die hospitaal uithelp nie weens sy ouderdom en sy vorige siektes.
En dr. Alex Park (Will Yun Lee, Kovacs in die sci-fireeks Altered Carbon, 20182020) moet aan kreatiewe maniere dink om pasiënte se lewe te red en hulle te troos, al is hul diagnose donkerder as ’n reënerige dag in Julie in Kaapstad.
NET GEWONE WERK
Dis egter nie net alles somber nie – daar is ligte oomblikke in die eerste episode wat wys hoe mense ingetrek word deur die piesangbroodgier of zoom- vergaderings wat op die mees onvanpaste maniere onderbreek word. ’n Mens kan jou daarme vereenselwig en maak dié seisoen in die besonder fassinerende kykstof, maar ook op ’n manier ’n openbare diens-aankondiging. Dis asof ons TV-helde lewens in die program én in die ware lewe probeer red.