Ek het dit gemaak
Ons moet almal iewers begin, nè? ’n Paar van die bekendste akteurs het hul groot kans deur Murder, She Wrote gekry.
Murder, She Wrote
Seisoen 1 Weekdae SABC2 (*192) 14:00 (begin 6 September)
Indien jy ’n kind van die 1980’s of 1990’s is, onthou jy dalk nog die vrolike temalied van die trefferreeks Murder, She Wrote (1984-1996). Met 264 episodes en 4 TV-flieks oor ’n tydperk van 19 jaar het Cabot Cove se skrywer van moordraaisels en misdaadoplosser, Jessica Fletcher (Angela Lansbury, die ballonvrou in die gesinsfliek Mary Poppins Returns, 2018) elke kreatiewe vorm van moord denkbaar gesien. Maar benewens die weeklikse skandalige moord, het Cabot Cove ook ’n paar bekende moderne akteurs gehelp om ’n voet in die Hollywood-deur te kry.
GEORGE CLOONEY
S1E2 Birds Of A Feather (1984) en S3E18 No Laughing Murder (1988)
Toe George se fyn besnede gesig as ’n onerkende kelner opduik, was hy onbekend in die toneelwêreld. Maar vier jaar later, in 1988, keer hy na Cabot Cove terug as Kip Howard, ’n dolverliefde man omring deur moordraaisels wat Jessica moet oplos.
Jy ken hom as: Danny Ocean in die Oceans-flieks (2001-2018).
CAITLYN JENNER
S1E16 Sudden Death (1985)
Die Olimpiese ikoon, toe gekrediteer as Bruce Jenner, maak sy verskyning as die atleet Zak Farrell, ’n trotse gesinsman wat ook die hoofverdagte in die moord van die week is.
Jy ken hom van: Die realiteitreeks Keeping Up With The Kardashians (2007-2021), asook die dokkie van ses episodes I Am Caitlyn (2015), wat Caitlyn se transformasie van manlik tot vroulik weergee.
BRYAN CRANSTON
S2E20 Menace, Anyone? (1986)
Sy karakter Brian East sterf vroeg in die episode in ’n motorontploffing. Moet dus nie jou oë knip nie, want jy gaan hom dalk misloop!
Jy ken hom as: Die onnie wat die dwelmbaas Walter White in die drama-reeks Breaking Bad (2008-2013) geword het.
COURTNEY COX
S3E1 Death Stalks The Big Top: Part 1 (1986)
Spierwit geklee en stralend, speel Courtney ’n jong sosiale vlinder op die punt om te trou. Maar dinge raak grillig wanneer ’n geskenk van Carol se vermeende oorlede pa by die troue opdaag.
Jy ken haar as: Monica Geller in die sitkom Friends (1994-2004), en Jules in die komediereeks Cougar Town (2009-2015).
LEVAR BURTON
S3E16 Death Takes A Dive (1988)
LeVar is die dapper sportverslaggewer Dave Robinson wat Jessica help om ’n belangrike leidraad te vind in ’n moordsaak met diep bande met die bokswêreld.
Jy ken hom as: Luitenant-kommandeur Geordi la Forge in die sci-fi-reeks Star Trek: The Next Generation (1987-1994).
JOHN McCOOK
S2E14 Keep The Home Fries Burning (1986)
Vergiftigde aarbeikonfyt lei tot ’n skokkende moord by die Joshua Peabody Inn en daar is verskeie verdagtes, en een van hulle is John se aantreklike, maar ontroue karakter Harrison Fraser III.
Jy ken hom as: Eric Forrester in die sepie The Bold And The Beautiful (1987-nou, lees meer op bl. 32).
MEGAN MULLALLY
S5E5 Coal Miner’s Slaughter (1990)
Jessica gaan na ’n myndorp om ’n gearresteerde oudstudent, Molly Connors, gespeel deur Megan, op borgtog vrygelaat te kry.
Jy ken haar as: Die fuiwende Karen Walker met die skril stem in die komediereeks Will & Grace (1998-2020), wat mense met haar beledigings vernietig.
DEIDRE HALL
S6E22 The Sicilian Encounter (1990)
Sy’s oulik, sy’s ’n konkelaar en sy’s die weduwee van ’n pas vermoorde bendebaas. Ontmoet die slinkse Claudia Carboni, gespeel deur Deidre, wanneer sy by haar oorlede man se volbelaaide Switserse bankrekening probeer inbreek.
Jy ken haar as: Deidre is al sedert 1976 ’n huishoudelike naam as die duiwelbesete psigiater Marlena Evans in die sepie
Days Of Our Lives (1965-nou, lees meer op ble. 32 en 33).