Leeuwyfie lê en wag
Dineo se moederlike kant en besigheidstalent smelt saam om haar stiefdogter en haar familie se nalatenskap te red.
Dis een ding om ’n vrou se maatskappy aan te val, dis ’n heel ander saak wanneer haar kinders in die spervuur beland. Dís die posisie waarin Dineo Price (Kgomotso Christopher) haar die volgende twee weke bevind wanneer haar stiefskoonseun James (Robert Hobbs) se bose komplot teen Dineo se stiefdogter Felicity (Mary-anne Barlow) en hul familiebesigheid Legacy Investments ontvou. “Dineo is nie ’n gek nie. Sy is ’n vrou, ’n ma, ’n dogter en ’n sakevrou. Sy moes in die verlede baie verduur met mense wat haar veroordeel en haar ’n fortuinsoekster genoem het, maar sy het nog altyd bo uitgekom,” sê Kgomotso. Haar karakter gaan in ’n hoek gedryf word wanneer sy haar wêreld wil red, maar dit gaan Dineo net aanspoor. “Die aanval op Legacy is pynlik. Die aanval op haar familie, selfs Felicity met wie sy al koppe gestamp het, is onvergeeflik,” waarsku Kgomotso.
PROBLEEMKIND
Sedert James begin Augustus uitgepluis het sy vrou het haar pa, Sebastian Price (Deon Lotz), September verlede jaar vermoor, manipuleer hy haar soos ’n poppespeler. Tot dusver het hy Felicity gebreinspoel om hom die onderneming se vergaderings te bestuur en kontrakte te sluit wat miljarde werd is en waarvan niemand anders weet nie, en ook seker gemaak Felicity is geskei van haar besorgde familie. “James is van nature ’n jakkals,” sê Robert. “Hy is nie ’n toproofdier nie en slaan toe nadat die slag reeds toegedien is, en hy snuffel rond en krap tussen die oorblyfsels.” Maar daardie oorblyfsels het hom gelei tot wat hy nog altyd wou hê: beheer van Legacy Investments en die miljarde rande in sy bankrekeninge. “Hy smag na mag, hy leef daarvoor en floreer daarop. Hy is ’n sieklike egoïs,” voeg die akteur by, wie se karakter begin September ál nader aan die HUB-kantoor skuif.
EEN STAP TE VER
Waarmee James nie rekening gehou het nie, is Dineo se veggees soos dié van ’n leeuwyfie en sy is baie meer as net ’n mooi gesiggie. “Sy is geleerd, sy het ’n graad en het sterk bly staan by Legacy teen mans wat op haar neergekyk het,” vertel Kgomotso. Dineo is straatslim. Soos om haar seun,
Sefako (Zenzo Ngqobe), ’n selfoon na Felicity te laat smokkel wanneer James en sy handlangers nie kyk nie sodat Dineo Felicity kan kontak en hulle hul aanval kan beplan. “Indien jy teen ’n lid van die Price-familie wil baklei, moet jy voorbereid wees,” waarsku Kgomotso. “Want jy pak die hele kliek – en ons is sterk!”