Girl Meets Farm
Seisoen 6 Food Network (*175) 19:25 Leefstyl
Niks is vir die kosblogger en sjef Molly Yeh lekkerder as om produkte uit haar agtertuin in smaaklike etes om te tower in seisoen 6 van haar kookreeks Girl Meets Farm (2018-nou) nie. “Ek geniet dit gate uit om in die kombuis kreatiewe geregte vir my gesin te berei,” sê Molly. “Kookkuns is ’n venster op ander plekke, kulture en gemeenskappe. Dis hoe ek myself verbind aan my Chinese en Joodse herkoms,” voeg die 32-jarige sjef by, wat saam met haar man, Nick Hager, van New York na die grens tussen Noord-Dakota en Minnesota in Amerika getrek het om sy familie se suikerbeetplaas oor te neem.
Benewens ’n laat ontbyt met ’n Mexikaanse tema wat sy vir haar vriende in seisoen 6 aanbied, bak Molly smaaklike happies vir oestyd en ’n reënboogkoek vir haar dogter, Bernie, se eerste verjaardag. “Ek het ure bestee om ’n partytjie met ’n groentetema vir Bernie te beplan. Ek het die internet gefynkam vir die perfekte kransies en uitrustings. Ek het die uitnodigings selfs met die hand geteken,” vertel Molly. Sy moes egter die partytjie in Maart 2020 weens Covid-19-beperkings kanselleer. “Ons het ons vriende en familie baie gemis, maar ek, Nick en Bernie het haar verjaardag steeds geniet. Ons het pannekoeke en bloubessies vir ontbyt gehad, hoendersop vir middagete, en natuurlik baie koek.”
Molly se familie kom ook in hierdie seisoen kuier en kook saam met haar, soos haar klassieke musikant-pa, John. Die twee span in episode 7 saam vir ’n Asiatiese middagete. “Ek betoon my liefde vir hulle met kos – ’n smaaklike ete of ’n koek,” onthul Molly.