AGTER DIE SYFERS
Ons word gereeld gevra hoe ons bepaal watter stories ons in tvplus plaas. Dis eenvoudig: Ons word gelei deur die kykergetalle wat ons kry van die Broadcasting Research Council of South Africa (BRCSA). Maar syfers vertel nie altyd die hele storie nie, dus probeer ons kyk en luister waaroor mense op die sosiale media praat en wanneer hulle (met sosiale distansiëring) om braaivleisvure staan. Dis ook hoekom die Engelse en Afrikaanse tvplus soveel verskil. In Engels is die gewildste sepies Uzalo met ’n reusagtige 7 763 153 kykers in Julie, en Generations met 6 404 266 kykers op sy hakke. Onder Afrikaanssprekendes was die telenovelle Deur Dik En Dun in Julie die voorloper met 705 864 kykers, Doodsondes met net onder
700 000, en dan 7de Laan met 623 320. Die gratis-kanale bly steeds die meeste kykers trek – en so ook eExtra – met programme op kykNET en kykNET & kie wat volg. En flieks bly ook supergewild. En waar sepies bo aan die Engelse kyklys is, wissel Afrikaanse kykers tussen flieks, nuus en dramaprogramme.
En natuurlik het die inperking ook die manier hoe ons TV-kyk verander, sê Gary Withaker, hoof van die BRCSA. “Minder mense kyk deesdae TV op tradisionele TV-stelle omdat hulle soveel meer toestelle, soos tablette, tot hul beskikking het,” verduidelik hy. En omdat baie van ons tydens die inperking van die huis af moes werk, het meer mense nou toegang tot die internet, wat ook meer toegang tot stroomkyk teweegbring. En vir my ’n bewys mans beheer steeds die TV-kontrole: Die fliek Transporter 3 op e.tv is in Julie die meeste deur vroue gekyk. Ek glo nie vir ’n oomblik dit was totaal uit vrye keuse nie!