Modern Family
Seisoen 11 Comedy Central (*122) 21:00 Komedie
Die laaste seisoen van ’n reeks laat intriges ontknoop en neem op ’n gepaste manier afskeid van die hoofkarakters, soos in seisoen 11 van die komediereeks Modern Family (2009-2020) gebeur. Ná 11 jaar en skreeusnaakse lewenslesse het die kinders gegroei van tieners wat op mekaar gil tot jong volwassenes, en die ouer sibbe het hul bande met hul ouers, lewensmaats en stiefma versterk.
Ná die geboorte van haar tweeling in die laaste episode van seisoen 10 (2018), het die oudste dogter, Haley (Sarah Hyland), van ’n loskoptiener in ’n verantwoordelike ma verander. Haar wetenskapike suster, Alex (Ariel Winter), werk aan ’n navorsingsprojek in die Suidpool en hul jonger broer, Luke (Nolan Gould), se tragiese liefdeslewe en laaste jaar op hoërskool hou hom besig. Haley en haar man, Dylan (Reid Ewing), trek dus by haar ouers se huis in. “Dit verloop nie so glad soos Hayley verwag nie,” waarsku Nolan. Haley en haar ma, Claire (Julie Bowen), sit gou vas oor hul teenstrydige ouerskapstyle.
“Daar gaan beslis baie spanning en drama in die Dunphy-huis wees met Haley se terugkeer. Soos al die karakters in hierdie seisoen hul uitdagings aanpak, werk Claire en Haley deur hul verskille, en hul wankelrige ma- dogterverhouding voltooi ’n kring,” sê Nolan.
Hoewel Modern Family baie gewild was, is dit beëindig om sy nalatenskap te bewaar, verduidelik die reeksbestuurder Christopher Lloyd. “Ons sluit op ’n hoë noot af en dis fantasties. Die reeks sal in kykers se gedagtes voortleef. Hulle sal dit hopelik onthou vir die innoverende storielyne oor die dinamiek van diverse families,” sê Christopher.