Celebrity Wife Swap US
Seisoen 4 SABC3 (*193) 17:30 Realiteit
Party ouers gee nie om as hul kinders op ’n skoolaand tot laat flieks kyk nie, ander pas streng reëls toe. Elke gesin het sy eie grille en die reeks Celebrity Wife Swap US daag twee beroemde vroue met verskillende sienings uit om hul huishoudings vir twee weke uit te ruil. “Dis ’n openbaring. Jy begryp hoe dit voel om in ’n ander vrou se skoene te staan,” sê die aktrise Pia Zadora (Beatnik in die fliekkomedie Hairspray, 1988). Sy het plekke geruil met die aktrise Cloris Leachman (Donna in die fliekdrama Not To Forget, 2021), wat in Januarie vanjaar ná ’n beroerte en Covid-19-probleme oorlede is.
In die eerste week pas die besoekende vrou aan by haar nuwe gesin se leefstyl. Die bordjies word in die tweede week verhang en die besoeker lê die reëls neer, wat dikwels tot vyandigheid en uitbarstings deur haar “nuwe” man en kinders lei. Aan die einde van die eksperiment keer die vrou na haar tuiste terug en albei egpare ontmoet mekaar. Hulle doen voorstelle oor die bestuur van mekaar se huishoudings wat spanning veroorsaak. Dis egter nie al die drama wat in die reeks voorkom nie.
Die Wife Swap-franchise het in Brittanje ontstaan en is vir 11 seisoene tussen 2003-2009 uitgesaai. Dit het in 2017 teruggekeer vir ’n spesiale Brexit-reeks met twee gesinne wat teenstrydige sienings oor Brittanje se onttrekking aan die Europese Unie het.
Die Amerikaanse weergawe is vir 9 seisoene en 3 vernuwings van 2004-2020 uitgesaai – die splinterreeks met beroemdes het net 4 seisoene gehad. Wife Swap US het vele twispunte gehad, soos uitbarstings wat glo voorgeskryf is en vervaardigers wat heimlik bakleiery onder die deelnemers aangestig het.