Marcie grawe haar eie gat in Diggstown
’n Nuwe begin op ’n ou dorp beteken drama op groot skaal.
Die nuwe regsdramareeks op Universal TV (*117) Diggstown draai om die 31-jarige, Kanadese prokureur Marcie Diggs (Vinessa Antoine), wat in die arm, maar energieke swart buurt North Preston, Nova Scotia, grootgeword het. Marcie het groot ekonomiese uitdagings oorkom om ’n gerespekteerde prokureur en die opkomende ster in haar firma te word – tot ’n saak wat tot haar geliefde tannie Rolanda (Karen LeBlanc) se selfdood gelei het en Marcie by die firma bedank het nadat sy gesien het hoe die regstelsel ’n lewe vernietig.
Sy is nou oorgehaal om vir geregtigheid te werk en haar tuisgemeenskap te dien deur die Halifax Legal Aid-firma. En wanneer die druk groot is, blaas Marcie stoom af deur branders te ry.
TVPLUS HET MET VINESSA OOR DIE ROL GEPRAAT
Wat was die hoofsaak wat die reeksskrywer en skepper, Floyd Kane, jou van Marcie
vertel het? Sy’s ’n simpatieke en gawe mens, en ek dink dit sê iets van haar Kanadese agtergrond. Sy is iemand wat ek nog nie voorheen, wat swart vroue betref, in dié rol op TV gesien het nie, maar as ’n swart vrou kon ek my onmiddellik met haar vereenselwig.
Hoe het jy vir die rol voorberei? Aanvanklik het ek ’n bietjie navorsing gedoen, ek het baie hofsake bygewoon, en met ’n paar prokureurs gepraat. Die skepper van ons reeks (Floyd) is inderwaarheid ’n prokureur. Ek het dus baie mense gevolg en vrae gevra, en van daar af het ek dit ontwikkel. (Sy moes ook leer branderry!)
Watter soort prentjie het Marcie in die begin van die reeks in haar gedagtes opgebou oor hoe dit sou wees om in ’n regshulpkantoor te werk? O, dis snaaks, want ek dink sy was so gewoond aan ’n korporatiewe omgewing, en selfs om ’n assistent en ’n groot, spoggerige kantoor te hê. Ek dink sy verstaan sy moes nie net haar salaris inkort nie, maar ook hoe sy haar
dag beplan. Julle sal in seisoen 1 sien sy het nie eens regtig ’n kantoor nie, hulle het haar ’n pakkamer gegee en sy is effens verras daardeur, maar sy sluk haar trots en besef dís wat sy moet doen, en sy hanteer dit net.
Hoe laat die regshulpwerk Marcie toe om werklik haarself te wees? Dit gaan oor omgee vir wat jy doen en dís haar reis in seisoen 1 – sy moet haarself afvra waarom is sy hier, hoekom het sy ’n prokureur geword. En dis wat gebeur wanneer sy besluit om na regshulp terug te gaan.
Waarmee is Marcie gekonfronteer sedert haar tannie se dood? Sy sukkel met die werklikheid van die regstelsel. Sy is gewoond daaraan om elke saak te wen, en om haar intelligensie en opleiding te gebruik om te kry wat sy wil hê. En by regshulp kry sy die sake waarmee sy nie normaalweg te doene gekry het nie – byvoorbeeld ’n enkelma met ’n leerprobleem wat gevaar loop om haar kind te verloor – en sy voel hulpeloos wanneer sy daardie saak verloor.
Hoe het jou eerste branderrytoneel voor die kamera verloop? Dit was wonderlik, ek het weke lank branders gery selfs nog voor ons by die kamera gekom het, en ek was uitgeput. Daar was ’n paar opnames, dis taamlik uitputtend, want ons moet elke keer van voor af begin.