Akteur, kulkunstenaar en reisiger
Geon Nel kry ná 20 jaar sy grootste TV-rol
Nêrens, Noord-Kaap Seisoen 1 Dinsdae kykNET (*144) 20:00
Die rol van die plaasbestuurder Frans Adendorff in die dramareeks Nêrens, Noord-Kaap is tot dusver sy gunstelingrol en hy is baie trots daarop, sê die akteur Geon Nel.
“Ek dink ons drie hoofspelers, De Klerk Oelofse (Andries) en Albert Pretorius (Ronnie), was al goed in ons karakters ingeburger omdat ons dieselfde rolle in die gelyknamige verhoogstuk van 2017 gespeel het.
“Voor die verfilming van die TV-reeks in Maart begin het, het ons genoeg tyd gehad om meer aan ons karakters te slyp en ons kon ook self insette lewer. Frans het byvoorbeeld so ietsie van myself in, want net soos hy het ek ook baie met vreemde drome geworstel,” vertel Geon.
“Maar gelukkig het mense nie gedink ek is met die helm gebore soos talle mense van Frans gedink het nie.”
DIE PLAASLEWE
Hoewel daar dalk ’n paar ooreenkomste met sy karakter Frans is, weet Geon nie of hy in die regte lewe ’n boer of plaasbestuurder kon wees nie. “Ek sal nie ’n idee hê waar om te begin as ek moet boer nie. Dit klink altyd so romanties om te boer en die stilte en wye, oop ruimtes van die plaaslewe lyk en klink baie aanloklik, maar wanneer dit so droog is en jy geduldig wag op reën waarvan jy totaal afhanklik is, is dit ’n ander storie.
“Dit is amper soos om ’n vryskutakteur te wees en nie te weet waar
jou volgende werk vandaan gaan kom nie,” sê hy. “Aan die anderkant dink ek daardie wêreld en leefwyse word by jou ingebore.”
Al dié faktore en die omgewing het ’n invloed op die ingetoë Frans, vertel Geon. “Ek dink die stilte laat Frans baie selfondersoek doen, maar ek weet nie of dit altyd ’n goeie ding is nie.”
Hy het ook daardie oorheersende stilte beleef toe hulle tonele in die Gannabos (wat bekend is vir sy kokerbome) naby Nieuwoudtville in die Noord-Kaap geskiet het. “Daardie stilte bring beslis ’n verdieping in jou menswees. Dit was ’n groot voorreg om in hierdie omgewing te verfilm,” voeg hy by.
KINDERDROME
Geon (39), wat op Gansbaai in die WesKaap gebore is, het as kind glad nie daarvan gedroom om ’n akteur te word nie. “Op 9-jarige ouderdom wou ek net een ding word: ’n kulkunstenaar. Ek het toe reeds boeke oor kulkuns begin lees. Gansbaai, waar ek grootgeword het, het nie juis die grootste biblioteek nie, dus het ek maar baie van die truuks self aangeleer.”
Hy het op hoërskool uitgevind daar is baie magic shops in Londen en toe al besluit hy wil ná matriek Londen toe en in een van daardie winkels gaan werk – wat hy gedoen het ná sy matriekjaar in 1999 aan die Hoërskool Overberg op Caledon.
“Ek het vir twee jaar in speelgoedwinkels gewerk, maar ook konstruksieen verfwerk gedoen en my kulkunstoertjies in klubs gedoen.” Geon het toe besef hy geniet dit baie om gehore te vermaak.
“Kulkuns is eintlik niks anders as oëverblindery nie. Jy leer hoe om jou gehoor te ‘beheer’ en hoe om mense se denkprosesse te onderskep. Maar dit verg ook baie selfvertroue om dit te doen. Uiteindelik betaal mense jou om vir hulle te jok.”
NUWE HORISONNE
Terug in Suid-Afrika, het hy besluit om drama aan die Universiteit Stellenbosch te studeer, en sy liefde vir die verhoog het vlam gevat. Verskeie verhoogproduksies, rolprente en TVreekse het gevolg, soos Die Vallei Van Sluiers (hy was Willem Greyling) en meer onlangs was hy – so in sy kraal – die kulkunstenaar, oftewel Die Dood, Veerman Charon in Die Boekklub (2016-nou). “Ek hou daarvan om ’n verskeidenheid rolle te speel. As akteur wil ek nie noodwendig in ’n kassie gesit word nie. Ek sal daarvan hou om in die toekoms die rol van ’n groot booswig te speel, want dit gee jou baie vryheid.”
Benewens toneelspel en kulkuns, wat hy steeds beoefen, is hy ook passievol oor reis. “Ek het al deur verskeie Afrikalande, soos Namibië, Botswana, Malawi, Angola, Zambië en Zimbabwe, getoer, Maar met die uitbreek van die Covid-19pandemie moes ek my reismiere ook so ’n bietjie inperk.”
Geon, wat in Stellenberg, Durbanville, woon, is al vyf jaar getroud met Elizma, wat by die maatskappy Cipla werk, en hulle het ’n dogtertjie, Nova (3). “My vrou is een van my grootste fans en ondersteun my baie in my loopbaan.”
Tydens die inperking het Geon ook met trail running begin, en hy vertel trots hy het al sowat 13 kg gewig afgeskud.
Hy het al baie lewenslesse geleer in sy loopbaan van twee dekades. “Een van die waardevolste lesse is om nie maklik tou op te gooi nie. Ek het ’n paar wonderlike mentors, soos (die regisseur) Marthinus
Basson, gehad. As student het Marthinus my al geleer toneelspel is nie net speletjies nie en jy moet baie hard werk,” sê Geon.