Totsiens, Baxters
Dis die allerlaaste seisoen van Last Man Standing wanneer die reeks groet – en dié keer is dit vir altyd.
Last Man Standing Seisoen 9 Saterdae M-Net (*101) 18:30 (begin 18 September)
Ná 9 jaar en 194 episodes loop die komediereeks Last Man Standing – weer – ten einde. Toe dit in 2017 sonder ’n behoorlike einde soos ’n warm patat deur die netwerk ABC gelos is, was aanhangers verpletter. Maar danksy die Amerikaanse netwerk FOX is die reeks ’n jaar later hervat om kykers die afsluiting te gee wat hulle verdien. Min het die kykers geweet hulle sou drie jaar later totsiens sê aan Mike (Tim Allen) en die Baxter-gesin (weer) – vir altyd.
WAT LAAS GEBEUR HET
Die hele seisoen 8 was oor die komende geboorte van
Kristin (Amanda Fuller) en Ryan (Jordan Masterson) se dogter. Om die waarheid te sê, die seisoen het geëindig met Kristin wat begin kraam het. Maar haar pyne was nie ál wat almal onkant betrap het nie. Covid-19 het ook ’n stok in die wiel gesteek toe die produksiespan, kort nadat episode 21 afgehandel is, gehoor het dis die einde van seisoen 8 wat oorspronklik 22 episodes sou hê. Die bestuurder, Kevin Abbott, sê hy was nie gereed om seisoen 8 voortydig te eindig nie. “Ek het gesê ek wil nie (die produksie) toemaak nie. Episode 21 is goed, maar dis nie ’n slotepisode vir ’n seisoen nie. Ons eindig met Kristin wat kraam – ’n reeks kan nie so eindig nie.” Wel, dit het en ons is nou gereed om te sien hoe Kristin en die familie hul jongste lid in die wêreld verwelkom . . . of nie.
IN WATTER JAAR?
Aanhangers gaan verras wees in episode 1 van seisoen 9 wanneer ons Kristin se dogter ontmoet – en sy is nie meer ’n pap baba nie! Die program het ’n tydsprong gekies om nie net die gekompliseerdheid van Covid te hanteer nie, maar ook om te verseker ons kon ontsnap na ’n post-pandemie, Baxtergevulde wêreld. “Aangesien ons nie die debuut van die seisoen sou wys tot Januarie 2021 (in die VSA) nie, het ons gewonder of ons werklik wil probeer voorspel hoe dit dalk in Januarie 2021 gaan lyk?” verduidelik Kevin. “Ons gaan ’n paar jaar vooruit beweeg in die seisoen sodat ons verby ’n paar van dié krisisse kon kom.”
AG, EVE!
Wat kan ons nóg van die allerlaaste seisoen verwag? Jammer, geen Eve (Kaitlyn Dever) nie, tot die heel laaste episode. En selfs dan sien ons net die Baxters se jongste dogter in ’n video-oproep. Omdat die aktrise reeds aan ’n ander projek gewerk het, was sy nie beskikbaar vir haar gereelde gasverskynings in die loop van die finale reeks nie en om haar by die stel vir die laaste episode te kry was logisties onmoontlik. “Ongelukkig kon ons haar nie betyds terugkry (vanaf Atlanta waar sy besig was met die verfilming van die fliekdrama Dear Evan Hansen, 2021, na LA waar Last Man Standing geskiet word) en al die kwarantynprotokolle en veiligheidsregulasies nakom nie,” verduidelik Kevin. “Ons het alles probeer, en ons kon haar net met Zoom op die program kry.” Vreemd genoeg, dit het goed uitgewerk met Mike en sy dogter wat ’n hartroerende oomblik gedeel het. “Tim voel baie vaderlik teenoor Kaitlyn, die Zoom-oproep het dus vir hom ’n persoonlik gelaaide betekenis gehad.”
LAASTE TOTSIENS
Tim sê dit was moeilik om totsiens te sê aan ’n karakter en toneelfamilie wat hy liefhet. “Ek was dol oor dié reeks, die spelers en span. Ek het nooit ’n slegte dag op die stel gehad nie. Natuurlik lewe al die akteurs nog en ons kan mekaar sien wanneer ons wil, maar ek het nog nie herstel van hoe dol ek was oor die wêreld wat ons geskep het nie.”
Aanhangers kan ’n sug van verligting slaak, want anders as die vorige slotepisode van die seisoen, gaan ons ’n behoorlike Baxter-totsiens kry. Oor twee episodes gaan ons sien hoe die gesin in hul agterplaas kampeer, terugdink oor Mike se geliefde, klassieke Ford F-100bakkie, asook die Baxters se onvergeetlikste oomblikke. Soos Mike in die allerlaaste toneel van die program sê: “Nou wil ek net dié oomblik met julle almal geniet.”