Liefde op die horison
Linda maak haar verskyning in Ruiterbosch en vang dadelik Bennie se oog.
Daar is altyd opwinding wanneer ’n nuwe gesig in Ruiterbosch verskyn, want almal wag om te sien of die karakter boos gaan wees of harte gaan verower. En iets sê vir ons Linda (Melissa Willering, Chrissie Bekker in Getroud Met Rugby, lees meer op bl. 28), Susan (Natasha van der Merwe) se jonger sussie, gaan gou ’n gunsteling word en in harte kruip!
IETS IS AAN DIE BLOM
“Linda is outisties,” vertel Melissa. Sy woon en werk in Johannesburg maar kuier tans by haar suster terwyl sy met vakansie is. Almal is hoflik en vriendelik teenoor Linda, maar daar is een inwoner, Bennie (Richard September) wat effens verstandelik gestremd is, wat in meer as vriendskap belangstel. “Bennie is gefassineer deur Linda en aanvanklik verstaan hy nie haar optredes nie, soos dat sy nie mense in die oë kyk nie of ’n obsessie met tyd het. Hy laat Linda selfbewus voel, maar soos die tyd aanstap, geniet sy Bennie se geselskap en ontwikkel ook ’n belangstelling in voëls – iets waarvoor Bennie ’n groot passie het,” sê Melissa.
LINDA WIL ONAFHANKLIK WEES
Sus Susan is nie baie gelukkig oor die gevoelens wat tussen Linda en Bennie broei nie en probeer ’n stokkie voor Bennie en Linda se eerste afspraak steek. “Linda is baie lief vir haar sussie, maar Susan kan oorbeskermend wees en dit veroorsaak groot frustrasie vir Linda wat daarna smag om meer onafhanklik te wees,” sê Melissa.
Intussen groei Bennie se gevoelens vir Linda en hy probeer haar soen, maar Linda vlug! “Sy weet nie wat om te doen met al die emosies wat sy ervaar nie,” verduidelik Melissa. Maar kort daarna het Linda ook sterre in haar oë wanneer sy en Bennie op ’n romantiese tweede afspraak gaan – en uiteindelik mekaar behoorlik soen. Wat gaan Susan doen?
’N UITDAGENDE ROL
Melissa vertel die rol van Linda was ’n uitdaging omdat sy al die maniertjies van iemand met outisme moes aanleer om die rol te speel. “Ek het baie navorsing gedoen en geleer oor hul obsessies, repetisies en onvermoë om te jok. Ek het dit alles in my vertolking van Linda uitgebeeld.”
Melissa is ook te sien in die drama Nêrens, Noord-Kaap (lees meer op ble. 14-15) waarin sy die rol van Fleur, ’n Nederlandse meisie, speel. “Sy gaan ’n groot impak op een van die drie broers hê,” verklap Melissa. Maar meer wil sy nie nou uitlap nie.
Melissa gaan vir sowat sewe weke as Linda in Suidooster te sien wees en sy verseker daar kom nog lekker drama.