VIER FEES IN JOU EIE HUIS!
Ag, om weer in Stellenbosch se strate van plek tot plek te kan loop om produksies van die Woordfees by te woon . . . Sou dit nie heerlik gewees het om die atmosfeer te beleef terwyl jou siel verryk word met ons wonderlike taal en plaaslike talent nie? Met Covid kan die
Toyota US Woordfees vanjaar weer nie plaasvind nie, maar die slim mense het aan ’n plan gedink en ons kan nou in ons eie huis feesvier.
Die Toyota US Woordfees kry vanjaar ’n tweede asem en gaan op DStv en GOtv (kanaal 15 in Namibië), uitgesaai word. Maak seker jy stel jou dekodeerder of sit voor die kassie, want van Vrydag 1 Oktober tot Donderdag 7 Oktober is die opwipkanaal Fees (*150) beskikbaar vir DStv Premium- en Compact Plus-intekenaars, maar dis ook moontlik om net vir ’n maand op DStv in te teken. Die programinhoud sluit ’n wye verskeidenheid genres in wat plaaslike toptalent ten toon stel: teater, skrywers en boeke, dans, leefstyl, skerpskertskomedie, kontemporêre en klassieke musiek, film, besprekings en visuele kuns. Die program het ’n sterk fokus op Afrikaanse gehalteboeke, -teater en -musiek.
Sestig uur se inhoud is vir die kanaal vervaardig – dis verstommend! Lusmakers sluit in Nataniël se boekgesprek oor 107 Kaalkoppe, asook David Kramer se 70ste verjaardaghuldeblyk, Boland Tot Broadway, met Emo Adams, Loukmaan Adams, Anton Goosen, Schalk Joubert en verskeie ander musiekvriende. Karen Zoid en die Kaapstadse Filharmoniese Orkes se konsert waarmee sy 20 jaar in die musiekbedryf met 20 van haar grootste treffers vier, is spesiaal vir die kanaal opgeneem en beloof om een van die fees se hoogtepunte te wees.
Moet dit nie misloop nie. Dis ’n groot bederf en balsem vir rou gemoedere. Dankie aan almal betrokke wat ons die kans gee om steeds ons taal te vier!