Gekies Vir Die Kollig
Seisoen 1 VIA (*147) 18:30 Realiteit
Die akteur Edwin van der Walt (Wian Marais in die dramareeks Fynskrif) se passie is die plaaslike vermaakbedryf, en daarom het hy NovieGuide, ’n aanlyn e-kursus vir filmwerk gestig. “Dis spesifiek gerig op jong mense wat nie die geld of geleentheid het om rolprent- en TV-werk aan ’n universiteit te studeer nie,” sê Edwin. Die besigheid is nog jonk, maar het vinnig aandag getrek, spesifiek van die Afrikaanse Taal- en Kultuurvereniging (ATKV). “Hulle het ons genader om betrokke te raak by die ATKVDigiToneel-kompetisie waartydens tieners die geleentheid kry om hul eie monoloë te skryf onder ’n nuwe temawolk en dan vir beoordeling te verfilm,” vertel Edwin. “Ons het die idee gekry om die kompetisie in ’n TV-reeks te omskep en so is Gekies Vir Die Kollig gebore.”
Edwin is die aanbieder, regisseur en vervaardiger. “Daar is net vier episodes, maar die inhoud is topgehalte en die deelnemers se ongelooflike talent het my asem weggeslaan.” Daar is 10 tieners van reg oor die land en van hulle het self hul oorspronklike monoloë geskryf. Ander het hulp van medeskrywers gekry. “Kykers gaan verras wees wanneer hulle die eindprodukte sien. Van die monoloë is kortfilms en die gehalte is puik. Dit gee my hoop vir die toekoms van die vermaakbedryf,” sê Edwin.
Ses mentors help die deelnemers, onder andere die akteurs Pietie Beyers (Roelof Schoeman in die dramareeks Siende Blind) en Lea Viviers (Yola in die Showmax-reeks Dam). Die DigiToneel-trofee, R5 000 en ’n jaar se lidmaatskap van NovieGuide is op die spel. “Kykers gaan verstom wees oor wat dié jong deelnemers kan vermag.”