Totsiens ou bedeling, hier kom Max!
Niks gaan dieselfde bly met dr. Max Goodwin as die nuwe hoof van die New Amsterdam-hospitaal nie.
New Amsterdam
Seisoen 1 Weekdae e.tv (*194) 20:30 (begin Maandag 4 Oktober)
“Hoe kan ek help?” Met hierdie eenvoudige vraag begin die nuut aangestelde mediese direkteur dr. Max Goodwin (Ryan Eggold) ’n inspirerende beweging om die New Amsterdam-hospitaal in hierdie mediese dramareeks te hervorm. En hou jou masker vas, want hy stel drastiese veranderinge in.
Die reeks – nou vir die eerste keer op gratis TV te sien – staan sy plek vol onder ’n string ander baie gewilde mediese dramas, hoewel dit op dieselfde basiese formule gegrond is. Terwyl ons die daaglikse gevalle in die hospitaal volg, sien ons ook hoe Max die stelsel probeer verander, en ons verken die personeel se persoonlike lewe en kwessies. New Amsterdam begin dalk stadig en ’n bietjie voorspelbaar, maar die onderliggende strominge sal jou gou boei.
Max probeer die lewe van pasiënte en personeellede verbeter deur die leiding te neem met inisiatiewe soos om pendeltyd te besnoei, onnodige operasies te verbied en om gesondheidsorg na mense te neem wat onwillig is om na die hospitaal te gaan. “Wat hom motiveer, is die opregte begeerte om te help,” sê Ryan. “Hy is gefrustreerd met ’n stelsel wat aan geld en winste voorrang verleen.”
Max, met die hulp van sy span, gaan dit verander. Onrealisties? Ja. Opheffend op ’n dramatiese sorg-vir-die-onderdrukte-manier? Beslis! AGTER DIE SKERMS Die hospitaalstel in die reeks is enorm. Dit bevat ’n tydelike hofsaal, ’n tronk, ’n kapel en selfs ’n dagsorgsentrum waar tonele vir ander reekse ook geskiet word.
DIE HULPVAARDIGE SPAN
is opgewonde oor die uitdaging om New Amsterdam te bestuur, maar dis duidelik sy vrou,
Georgia (Lisa O’Hare), is nie. Max probeer wanhopig sy huwelik red, en nie net omdat sy vrou swanger is nie. Hy het Georgia lief en weet hy moet sy hospitaaltyd verminder. Maar dan kry sy gesondheid ’n knou wat die toon aangee vir die grootste deel van die eerste seisoen. “Hy moes leer hoe om ’n pasiënt te wees,” vertel Ryan. “Max moet terugtree en ander toelaat om vir hom te sorg soos hy vir sy pasiënte sorg.”
Max Goodwin
Dr. Floyd Reynolds (Jocko Sims) word in episode 1 die hoof van kardiovaskulêre chirurgie en hy ondersteun Max se idees om die stelsel te verander. “Hy’s ’n ernstige ou en trots op sy werk. Hy’s ’n streng ou wat nie grappies maak nie,” sê Jacko oor Floyd.
Dr. Lauren Bloom (Janet
Montgomery), hoof van die noodafdeling, het aanvanklik ’n kortstondige affair met Floyd, maar word dan vasgevang in haar stryd met AGHS (ADHD) en verslawing aan pynstillers. Janet erken sy was vreesbevange om iemand te speel wat soveel “slimmer” as sy is. “Maar nou raak ek slimmer deur ’n dokter te speel,” sê sy in haar oorspronklike Britse aksent. Dr. Helen Sharpe (Freema Agyeman), hoof van onkologie, speel ’n groot rol as Max se vertroueling en daar is ’n onderliggende aangetrokkenheid tussen hulle. “Ek dink nie hy sal sy vrou ooit verkul of ’n buite-egtelike verhouding hê nie,” sê Ryan, maar hy erken sy karakter het dalk gevoelens vir albei vroue. Dr. Iggy Frome (Tyler Labine) hoof van gedragstudies, raak soms te betrokke by sy pasiënte hoewel hy innoverend dink. Tyler was eintlik ’n bietjie in die moeilikheid, want hy het nie geweet of hy ’n psigiater of sielkundige speel nie! “Hulle het my toe die hoof van gedragstudies gemaak en dit het my hele storiepoel oopgemaak,” verduidelik Tyler. En met Max se toestemming kan hy nou die “onafhanklike denker wees wat hy is”. Dr. Vijay Kapoor (Anupam Kher) het ’n spesiale vriendskap met Iggy, en as die neurologie-spesialiste deel hulle ’n unieke manier in die behandeling van pasiënte. “Die deernis van elke karakter teenoor sy beroep, teenoor die pasiënt, teenoor dinge verbeter [het my beïndruk],” sê Anupam. “Hulle is nie dokters met ’n stetoskoop nie. Hulle is ook dokters met ’n hart, en hul hart klop vir almal.” Wag net vir die einde van seisoen 1 – dis ’n dolle botsing van emosies!