Pret vir die hele gesin!
SABC2 spog met ’n speletjiesprogram wat gou-gou ’n gunsteling by kykers gaan word.
Seisoen 1 Donderdae SABC2 (*192) 19:00
Die legendariese musiekspeletjiesprogram Noot Vir Noot is sonder vrees vir teëspraak volksbesit. Die oud-TV-aanbieder en vervaardiger Johan Stemmet en sy span by Stemburg Produksies het die program oor die jare verfyn en dis vandag steeds gewild met die vermaaklikheidster Emo
Adams (aanbieder van die laatnag-geselsreeks Jou Show) wat die leisels in 2019 by Johan oorgeneem het.
Nou het Stemburg Produksies nóg ’n program op sy lys: Klop Die Kunstenaar met die komediant Alfred Adriaan as aanbieder. Die reeks is vol pret, plesier en gesinsvriendelike inhoud wat kykers se Donderdagaande opkikker!
HOE WERK DIT?
Carl Stemmet, die kreatiewe regisseur en Johan se seun, sê hy en sy span is baie trots op die nuwe speletjiesprogram. “Ons het vroeg verlede jaar tydens ’n werksessie in
Londen met die konsep vir die program vorendag gekom. Toe vlak 4-inperking in Mei 2020 aangekondig is, het ons die 13 episodes van die reeks verfilm.”
Carl verduidelik die reeks bestaan uit vier segmente waarin ’n verskeidenheid speletjies gespeel word, soos ’n geheuespeletjie, of deelnemers moet raai wat of wie in ’n prentjie is wat vergroot is. “Dis ’n versameling van parlour
games en in elke episode speel twee deelnemers dit.”
Soos punte ingeoes word, beweeg die deelnemers teen ’n virtuele toring op en die deelnemer met die meeste punte kan aan die boerpotronde deelneem. “Die boerpotronde is baie opwindend, want daar is R10 000 op die spel en die deelnemer het net een kans om dit te wen,” sê Carl.
“’n Vraag word aan die deelnemer gevra, byvoorbeeld, vir watter fliek is die akteur Will Smith die bekendste? [Ons sou raai die sci-fi-fliek Men In Black.] Die deelnemer moet mooi dink voor hy of sy die vraag beantwoord, want dieselfde vraag word aan vier kunstenaars gevra wat in elke episode verskyn.
“Dit sluit in kunstenaars soos die komediant Schalk Bezuidenhout en die sanger Kurt Darren, wat op groot skerms uit die gemak van hul eie huis verskyn en saamspeel.
“Die deelnemer se antwoord op die vraag [soos Men In Black] moet ooreenstem met ten minste een van dié vier kunstenaars en dan wen hulle die boerpotprys,” verduidelik Carl.
ALFRED IS ’N AANWINS
Alfred Adriaan is al 10 jaar in die komediebedryf en sê dis die eerste reeks wat hy alleen aanbied. “Dis wonderlik en ek kan nie genoeg dankie sê aan Johan en Carl vir die geleentheid nie.”
Aan die begin van elke episode spog Alfred met sy komedietalente. “Ek open die program met ’n mini stand-up
vertoning, en dis heerlik, want ek vertel ’n lekker storie, en laat die deelnemers lag, en dit stel my op my gemak.”
Alfred sê almal in die reeks – van die deelnemers tot die kunstenaars – is baie vriendelik met mekaar, maar wanneer die speletjies begin, raak hulle mededingend met net een doel voor oë: “Om te wen en die boerpotronde te haal.”
’N GUNSTELING
“Ek dink die program gaan gou ’n gunsteling by kykers word,” voeg Alfred by. “Die inhoud en speletjies is family friendly, en ek kan klaar in my geestesoog sien hoe gesinne elke Donderdagaand in die sitkamer voor die TV bymekaar kom om Klop Die Kunstenaar te kyk, saam te speel en die antwoorde na die skerm skree.”
Carl sê hy en sy span is reeds besig om met SABC2 te gesels oor ’n nuwe seisoen van Noot Vir Noot wat hopelik volgende jaar uitgesaai sal word. “En dan beplan ons om die tweede helfte van seisoen 6, met 13 splinternuwe episodes van Musiek Roulette (ook ’n Stemburg-speletjiesprogram met die sangeres Nadine as aanbieder), ná Klop Die Kuntenaar op SABC2 uit te saai.”
Maar vir eers kyk ons wie gaan die kunstenaar klop met die finale uitklophou!