Terug vir liefde
Esti het uit haar koma ontwaak en sy’s reg vir liefde – maar gaan die man van haar drome haar ’n tweede kans gee?
Maskerballe is gewoonlik dramaties in voorkoms alleen.
Die blink maskers en pragtige uitrustings maak daarvan ’n werklik onvergeetlike geleentheid. Die Welmangesin se onlangse maskerbal was nie ’n uitsondering nie, hoewel daar ’n bietjie meer drama was as wat die
Hillsiders verwag het toe
Esti (Reandi Grey) ’n verrassingsverskyning maak nadat sy maande lank in ’n koma was!
VERRASSING!
Twee Hillsiders was meer verras as ander om ’n op en wakker Esti te sien – haar eksman, Rickus (André Lötter, lees meer op bl. 25), en veronderstelde ware liefde, Marko (Francois Lensley). Reandi verduidelik die beweegrede vir Esti se besluit om haar merkwaardige herstel by die maskerbal te onthul, en sê dis heel ironies: “Hoewel Esti nie van verrassings hou nie, is dit vir haar lekker om mense te verras. Sy het dus besluit dit sal die beste manier wees om Rickus en haar seun, Thomas ( Vian
Singleton), die grootste verrassing van die jaar te gee!”
Sy het ongelukkig gou besef presies hoeveel dinge verander het sedert sy in Oktober verlede jaar in ’n koma verval het, toe sy sien hoe haar man haar beste vriendin
Lana (Mila Guy) by die bal soen. Haar man het nie net aanbeweeg nie, Esti vind ook uit sy is nou ’n geskeide vrou, en Reandi sê haar karakter sukkel om haar onverwagte alleenloper-status te aanvaar. “Esti dink eers Rickus gee klaarblyklik nie om nie, want hy het ’n ander vrou by die bal gesoen. In haar gedagtes is hulle pasgetroud en nou is hulle geskei?” Maar ná ’n lang gesprek met Rickus, begin sy verstaan hoekom hy gekies het om hul huwelik te beëindig.
WARE LIEFDE
Waar laat hierdie ongewone situasie dus vir Rickus, sy nuwe liefde Lana, Marko en Esti? Nadat sy Rickus se besluit om te skei, aanvaar en daarmee vrede gemaak het, besef Esti uiteindelik sy moet ook aanbeweeg – en sy het net die man in gedagte om haar gebroke hart weer heel te maak.
“Wanneer sy terugkyk en dink aan Marko se liefdesverklaring in die hospitaal middel September terwyl sy vermoedelik steeds in ’n koma was, besef Esti Rickus was altyd haar tweede keuse,” erken Reandi. “Esti het nooit opgehou om Marko lief te hê nie, en nou het sy die geleentheid om saam met die man wat sy liefhet, te wees.”
Dis ’n raaisel of Marko gereed is om Esti in sy lewe terug te verwelkom, maar ons hoop heimlik hy vou haar net in sy arms toe wanneer hulle eers dinge uitgepraat het.
Intussen kan ons nie help om te wonder of Rickus regtig met sy onkonvensionele egskeiding vrede gemaak het nie. Hunker hy dalk steeds na
Esti al het hy vir Lana aan sy sy? Dit is ongelukkig Hillside en die liefde het in hierdie klein voorstad die neiging om uiteindelik skeef te loop . . .
VERLEDE KEER
Khethiwe het als in haar vermoë gedoen om nader aan Romeo se ma te kom, Aggie en Connie se harte was stukkend nadat hulle die baba aan haar gesin moes teruggee, en Alexa het meer druk op Amorey geplaas oor die surrogaatplanne.
IN DIÉ UITGAWE
Dinge ruk handuit by die maskerbal ná Esti se skielike verskyning en Chris moet beheer neem van die chaotiese situasie. Gabby raak ál meer besorg oor Tjattas, en DeWet is vol vreugde omdat dinge uiteindelik volgens plan verloop. Thomas maak gereed vir sy matriekafskeid, maar als verloop nie soos hy dit wil hê nie. Sy ontwerperspak is eerstens ’n absolute ramp, en dan bevind hy hom sonder ’n ordentlike motor vir die groot geleentheid. Chris bied gelukkig aan om Thomas se bestuurder te wees, wat die terneergedrukte tiener se gees ’n bietjie verhelder, en Mariaan voer ’n stryd om al die onlangse Esti-drama te verwerk.
Shawn en Rickus het ’n ernstige gesprek oor Lana en die toekoms van hul verhouding, en Gabby hoop om vir haar vriend Tjattas ’n verrassingspartytjie te reël. Marko herleef die verlede tydens sy stryd om ’n groot besluit oor sy toekoms en liefde te neem, en Ivy gee Rickus broodnodige raad oor sy verhouding met Lana, maar sal hy na haar luister? Shady raak al hoe meer gefrustreerd omdat Romeo aanhou om haar om geen goeie rede eenkant toe te skuif, en sy’s op die punt om ’n antwoord van hom te eis.