Bewaar ons planeet
Die balans tussen mens en die natuur is in die kalklig.
50/50
Seisoen 11 Maandae SABC2 (*192) 19:00 (begin 4 Julie)
Die omgewingsprogram 50/50 is al soos ’n stukkie kosbare erfenis in Suid-Afrika en ’n baanbreker in verskeie opsigte, sê
Clive Morris, uitvoerende vervaardiger by Clive Morris Produksies wat hierdie reeks al 11 jaar lank vervaardig. “Talle mense begin nou eers besef hoe belangrik die balans tussen die mens en natuur is. In daardie opsig was 50/50 die tyd vooruit, want die program fokus al ’n geruime tyd op belangrike omgewingskwessies, soos aardverwarming, volhoubare energie en die bewaring van bedreigde spesies wat vandag ál meer op die voorgrond kom,” sê
Clive. “Ons kyk ook na groot nywerhede soos myne en fabrieke wat onvolhoubaar funksioneer en sodoende die natuur beskadig.”
OPVOEDKUNDIG EN LEERSAAM
Die nuwe seisoen bou voort op sy wenformaat en aktuele inhoud, en belig bewaringskwessies wat elke mens, dier en plant op die aarde raak. “Die nuwe seisoen spog met ’n moderne stel, en beter graphics,” sê Kirsten Horne, inhoudsbestuurder by 50/50.
Daar is talle insiggewende insetsels waarna kykers kan uitsien. “Een van die interessante stories is hoe cannabis as boumateriaal gebruik kan word. Cannabis verminder nie net die koolstofspoor nie, maar is ook brandvas en bied goeie insolasie. Nóg ’n leersame insetsel is oor hoe vleis in ’n laboratorium gekweek word,” vertel Kirsten.
Die kollig val ook op wetenskaplikes, navorsers en bewaringsaktiviste wat vernuwend dink. Een van dié wetenskaplikes is Phumelele
Mashele, ’n geologiestudent wat besig is met haar meestersgraad aan die Universiteit van die Witwatersrand. Sy werk tans aan die internasionale Moodies BASE-projek (Barberton Archean Surface Environmental
Project) waarin grondmateriaal uit die Barberton Makhonjwa-berge ontgin word om vas te stel hoe die aarde miljarde jare terug gelyk het.
“Daar’s talle wetenskaplikes en navorsers in Suid-Afrika wat ongelooflike werk op die gebied van omgewingsbewaring doen en ons vertel graag hul stories. En 50/50 fokus ook op mense wat op grondvlak in hul gemeenskappe ’n verskil maak en ons wys die omgewingsprojekte waarmee hulle besig is,” voeg sy by.
PRAKTIESE WENKE
Die reeks is vol praktiese idees wat ons elke dag kan toepas om ons omgewing te verbeter. “Die program kyk onder meer hoe jy van ou rekenaars ontslae kan raak, of hoe jy ’n koeldrankbottel aan jou tuinslang kan koppel om water te bespaar. Daar is ook goeie raad oor hoe jy van rommel ontslae kan raak of kan herwin,” vertel Clive.
In die gereelde insetsel Kia’s Challenges word die aanbieder Kia Johnson uitgedaag om op een of ander manier ’n verandering in haar omgewing te maak, vertel Kirsten.
“In die een insetsel wys Kia byvoorbeeld hoe ’n gebruikte teesakkie die roes van kombuispotte kan verwyder, hoe hout met tee gepoleer kan word, of hoe tee onaangename reuke in jou motor kan absorbeer. Daar word ook gekyk hoe die inhoud van ’n teesakkie as kompos gebruik kan word.”
Kia word ook uitgedaag om ’n “groen” geskenk vir haar suster te kry, soos om een van die beseerde SANCCOB- (South African Foundation For The Conserva-tion Of Coastal Birds) pikkewyne of ’n pikkewyn-eier aan te neem of lidmaat-skap tot die Botaniese Vereniging as geskenk te gee.
INTERAKTIEF
Veldfokus, waarheen kykers foto’s en video’s uit die natuur kan instuur, word weer deur Albertus Louw aangebied. ’n Kontantprys van R5 000 word maandeliks toegeken en aan die einde van die reeks kry die algehele wenner die groot prys van R75 000 kontant. Kirsten sê die reeks is steeds ’n moetkyk, want elke Suid-Afrikaner word daagliks deur bewarings kwessies geraak: “Of dit nou die veldbrande in die Wes-Kaap, vloede in KwaZuluNatal, of die waterkrisis is.”
SPOG MET BAIE MYLPALE
Die veel bekroonde natuurbewarings reeks 50/50 spog met talle mylpale en is een van die SABC se vlagskip-produksies. Die reeks is al 34 jaar op die lug en is een van die omgewingsreekse wat die langste ter wêreld op televisie uitgesaai word.