Plaas-speletjies
Stadsjapies hou hul lyf boer op die plaas vir R1 miljoen.
Plaasjapie
Seisoen 1 Donderdae kykNET (*144) 20:00 (begin 14 Julie)
Dís ’n realiteitsreeks soos jy nog nooit gesien het nie! “Ons het ’n wilde perd opgesaal,” sê die regisseur Nina Swart van dié nuwe program, Plaasjapies. “Ek moet nou al die plaasmetafore gebruik,” skerts sy.
En die reeks is soos om ’n jakkals in die kallerhok los te laat. “Dis ’n sosiale eksperiment en dit was interessant om te sien hoe die mens se natuur uitkom in dié opset,” sê die skepper Albert Snyman. Dis sy eerste realiteitsreeks saam met sy vennoot Louis Pretorius, wat gewoonlik dramareekse soos Die Boekklub en Troukoors (nou op Showmax) skryf.
“Ons het baie navorsing gedoen en is uiters tevrede met die eindresultaat. Hier kom beslis ’n ding!” En Plaasjapie is inderdaad ’n perd van ’n ander kleur!
DIE KONSEP
Agttien deelnemers gee hul gemaklike stadslewe prys om in twee spanne vir 21 dae op ’n plaas te boer. “Hulle moet alles doen wat boere gewoonlik doen: Varke en skape versorg, mielies verbou en koeie melk,” verduidelik die aanbieder Ewan Strydom, wat self ’n plaasjapie is en reeds sy slag voor die kamera as medeaanbieder van kykNET se joernaalprogram Bravo! gewys het.
Benewens die versorging van hul plaas ding die twee spanne in elke episode mee in uitdagings – van ’n hindernisbaan waar oor hooibale geklouter word, tot meer intellektuele speletjies om die spelers almal ’n wenkans te gee. Iemand van die verloorspan word in elke episode uitgestem, tot een nuwe boer die R1 miljoen-prysgeld opraap.
“Dit klink soos Survivor, maar dit is nie,” verduidelik Nina. “Hulle leef in baie basiese omstandighede in ’n skuur, maar kry drie maaltye per dag. Die groot ding is om na jou plaas om te sien. En om iemand uit te stem, is strategies: Jy kan nie die ou uitstem wat dalk die beste vaar met die skape se versorging nie, want wie gaan dan die skape se goeie kondisie handhaaf? En, die varkies en skapies het ook hul gunstelinge gekies.”
Daar is nóg ’n kinkel. “Met elke uitdaging kan jy ’n luuksheid wen, soos kampbeddens vir almal,” sê Albert. “Maar wanneer die persoon wat dit gewen het, uitgestem word, verloor hulle dit. Jy moet dus mooi dink wat jy doen.”
MENS EN NATUUR
Luukshede het later nie saakgemaak nie, sê Albert. “Ons het in die Swartland in moeilike toestande verfilm. Dit was soms so warm, die kameras het oorverhit. Dink net hoe die deelnemers gevoel het wat in daardie son op ’n plaas van 5 ha moes wérk!
“Die deelnemers moes van die begin af in skottels was en baie handearbeid verrig, want die hele reeks draai om basiese boerdery – geen toerusting of moderne geriewe nie. Die deelnemers het met ’n Survivor-idee opgedaag en gedink hulle moet alliansies vorm, maar dit het vinnig verander. Almal moes saamwerk om hul einddoel te bereik. Kampbeddens en ander luukshede was nie meer belangrik nie, want almal het gou een geword met hul omgewing.”
OORSPRONKLIK
Plaasjapie is uniek aan Suid-Afrika en nie geskoei op enige fanchise of bestaande formaat van ’n reeks, soos Boer Soek ’n Vrou wat ook in ander lande uitgesaai word nie. “Dit was besonders om iets so eg aan ons land te doen. Mense besef nie wat dit verg om te boer nie, maar dis so ’n belangrike deel van wie ons is,” sê Ewan wat die deelnemers met deernis behandel het. “Deelnemers het saans om die kampvuur gesit. Dan is dit stil. Net jy en die mense om jou wat al hoe minder word soos die reeks vorder. Ek was eintlik jaloers op hulle, want jy word werklik een met alles om jou.”
DIE DEELNEMERS
Teen druktyd mag ons nog nie vertel wie die deelnemers is nie, maar Nina sê: “Ek is verlief op almal. Daar is ’n lekker mengsel van die poppie tot die Jock. En dis wonderlik om te sien hoe hulle almal deur die reeks groei. Dit was eintlik hartseer toe die verloorspan by die koöperasie by Ewan gaan kuier het en iemand moes huis toe gaan.” En Albert sê die wenner gaan ’n groot verrassing wees. “Maar dis ’n waardige wenner! En ek kan jou sê, gestroop van alles sal mense jou verbaas. Eintlik is ons almal meer goed as sleg.”