The Murder Tapes
Seisoen 5 ID (*171) 21:00 Ware Misdaad
The Murder Tapes is terug in grafiese en gewelddadige detail. Speurders en forensiese spesialiste berig eerstehands oor van die ergste moordsake wat hulle ondersoek het en hoe hulle die moordenaars opgespoor en tronk toe gestuur het. “Ons leef in ’n verskriklike wêreld en dit is vreesaanjaend om te besef hierdie monsters bly in dieselfde ruimte as ons,” sê die verteller Dave DeAndrea.
Dave verstaan nie mooi waarom die reeks ondanks sy grusame onderwerp so gewild is nie. “Ek het gehoor ons mense het ’n beheptheid met dinge wat buite ons normale lewe is, dinge wat vir ons vreemd is. En moord is beslis vreemd, want ’n regdenkende mens word nie wakker en besluit om iemand dood te skiet nie.” Maar dis die soort goed wat die reeks ondersoek – abnormale gedrag van mense wat die hoofopskrifte om die verkeerde rede haal: ernstige misdade.
Die program het ’n reeks kontrolepunte ingestel om seker te maak die stories word so goed moontlik vertel. “Ons kry ’n lys van almal wat by die sake betrokke is, van die eerste polisiebeamptes op die toneel, regdeur tot by die patoloë wat die nadoodse onder-soeke behartig. Indien een van hulle weier om met ons te praat, skrap ons daardie saak, al is dit hartverskeurend en tragies. Ons wil die volle storie hê en ons doen alles moontlik om die slagoffer se verhaal te vertel en aan hul gesin, met wie ook onderhoude gevoer word, afsluiting te gee,” sê Dave.
Die moeilikste deel is egter die keuse van watter moorde om te ondersoek, want daar is so baie. “Daar is mense wat al vir ’n paar seisoene vir ons skryf,” sê Dave, en voeg by: “Dis moeilik om vir sommige van hulle nee te sê, want dis ’n tragedie en jy kan nie help nie. Soms wil ons help, maar ons kry nie al die nodige inligting nie.”