Desert Rose
Seisoen 1 M-Net (*101) 20:30 Drama
Die allerlaaste episode van die plaaslike dramareeks Desert Rose word vanaand uitgesaai, en Daniah de Villiers (Maggie in die sepie Suidooster, lees meer op ble. 24 en 25) wat Lucy Greyling speel, sê dit is skokkend. “Sjoe! Die laaste episode is my gunsteling,” sê sy. “Dis vol aksie en bakleitonele namate die storielyn tot sy klimaks opbou, wat bevredigend is en hopelik kry die Greylings nou vrede.”
Dit was ’n moeilike pad nadat die gesin Rosie (Tinarie van Wyk-Loots, Lara Kruger in die dramareeks Fynskrif) in ’n motorongeluk verloor het. Sy was die oudste Greyling-kind en ook Lucy se ma. “Die gesin moes mekaar weer vind toe die patriarg Freddy (Fingers)
Greyling (Neil Sandilands, Bernoldus in die plaaslike rilreeks Dam), wat hulle verlaat het, terugkeer. “Lucy het nie haar ma se dood goed verwerk nie,” vertel Daniah. “Rosie was baie lief vir Lucy, maar Lucy het geheime vir haar ma verberg, en Lucy is baie soos haar oupa Freddy.”
Die grootste geheim is Lucy se gevoelens vir haar netbalafrigter en onderwyser, Gus Dolly (Christiaan Schoombie, dr. Greeff in die sepie Binnelanders, lees meer op ble. 28 en 29). Rosie was agterdogtig oor Lucy se verhouding met Gus, en ná Rosie se dood, het Lucy haar op haar verliefdheid toegespits om haar aandag van haar hartseer af te lei, wat ingewikkelde gevolge gehad het. “Lucy speel graag met vuur,” sê Daniah. “Sy’s ’n wildekat en dis omdat sy pappa-kwessies het.” En van pappa gepraat – wie is Lucy se biologiese pa? “Ek kan dit nie verklap nie, maar hy daag aan die einde van die reeks op – en dit is nóg ’n skok,” voeg Daniah by.