Fantasy Island
Seisoen 1 Universal TV (*117) 20:00 Fantasie
Dis geen verrassing dat gaste uit al die uithoeke van die wêreld die weelderige tropiese oord Fantasy Island in die gelyknamige reeks besoek nie. Hul drome wissel van die vermoë om te eet wat hulle wil sonder om gewig aan te sit, tot ’n reis na die verlede om hul gunstelingskrywer te ontmoet – niks is taboe nie, maar daar’s ’n vangplek. Die “versorger” op die eiland, Elena Roarke (Roselyn Sánchez, Carmen Luna in die dramediereeks Devious Maids) vervul nie die gaste se wense soos hulle verwag nie.
Elena lei hulle deur middel van ’n reeks lesse nader aan die antwoorde waarna hulle soek. “Die gaste wil dolgraag hul drome vervul, want hulle dink dit is die sleutel tot hul geluk, maar dit is glad nie waar nie,” verduidelik Roselyn, wie se karakter aan die gaste ’n ander perspektief op hul kwessies gee. “Sy lei hulle eerder tot aanvaarding van en waardering vir hul lewe soos dit is, as hoe dit kan wees. Gevolglik verlaat die gaste die eiland met insig en as herskepte mense.”
In episode 4, byvoorbeeld, wil die gas, die musikant Alma (Gigi Zumbado,
Tammy in die komediereeks
Bridge And Tunnel) bande met haar familie verbreek omdat hulle haar loopbaankeuse afkeur. Pleks van Alma se droom bewaarheid, oorreed Elena die musikant om in tyd terug te gaan om haar familie se geskiedenis in Kuba te verstaan voor hulle na die VSA verhuis het, en hoekom hulle voorbehoude het. Alma en haar geliefdes maak uiteindelik vrede danksy Elena se raad. “Al die karakters in Fantasy Island het traumatiese ervarings gehad wat hul lewensuitkyk gevorm het en Elena help die gaste om eerder hul onsekerhede en vrese te hanteer as om aan kitsoplossings toe te gee,” onthul Roselyn.