Unboxed With Nikki Chu
Seisoen 2 The Home Channel (*176) 18:30 Leefstyl
Van die verfraaiing van ’n paartjie se slaapkamer om hul huweliksherdenking te vier, tot die opknapping van ’n onpraktiese huurwoonstel in ’n sjiek nuwe ruimte wat ’n huisbaas se goedkeuring sal wegdra – die bekende binneversierder Nikki Chu omskep haar kliënte se huise in meesterstukke in die opknapreeks Unboxed.
Aan die begin van elke episode gee Nikki twee bokse met besielende artikels en hulle kies een. “Die bokse kan artikels bevat wat die kliënte dalk nie herken nie, soos ’n goue bak of ’n fles gevul met sand,” verduidelik Nikki, wat nie haar ouderdom wil verklap nie. Die doel is om die dekorstyl wat die kliënte aantrek, te bepaal. Nadat hulle besluit het, laat die kliënte hul huis vir twee dae in Nikki se hande en wanneer hulle terugkeer, stap hulle by ’n lieflike opgeknapte tuiste in.
Nikki vertel daar’s groter druk in seisoen 2. Benewens kykers wat inskryf en haar raad vra, help sy ook haar A-lys-pelle, soos die akteurspaartjie Boris Kodjoe (Robert Sullivan in die dramareeks Station 19) en
Nicole Ari Parker (Lisa Wexley in die komediereeks And Just Like That . . .) wie se patio Nikki in episode 1 opknap. “Die mense na aan my vra ’n paar dekorwenke, maar hulle huur my nie om ’n hele ruimte op te knap nie. Dis oorweldigend, maar ek is reg vir die uitdaging,” sê sy.
Wat Nikki ’n voorsprong gee, is sy weet waarvan haar vriende hou. “Ek vang hul persoonlikheid vas en haal hulle uit hul gemaksone. Hierdie seisoen is emosioneel en lê my na aan die hart,” voeg die binneversierder by.