Met oop hart en hand
Werner en Denzil leer die Hillsiders om mekaar op dié Mandeladag met ’n skop en ’n klap te help.
Is die wêreld gereed vir die Madibahou? Dis nie so gek soos wat dit klink nie. Op Mandeladag op Maandag 18 Julie, ter ere van wyle pres.
Nelson Mandela, het Werner Visagie (Zak Hendrikz) ’n spesiale geskenk vir die Hillsiders: selfverdedigingsklasse.
Sedert Werner in November 2021 na Hillside gekom het, is Zak beïndruk deur sy karakter se toegewydheid om mense met ’n hand en hart te help. “Die eerste persoon wat Werner ontmoet het, was Zee (Ray Neo Buso). Hy was geslaan en Werner het hom met selfverdediging probeer help,” sê Zak. “Toe hy op die plaas gebly het, is Werner gekonfronteer deur ’n bende inbrekers, en hy werk nou vir DeWet (Dirk Stoltz) se sekerheidsmaatskappy. Hy het ook ’n blou gordel in karate, Werner is dus die perfekte persoon om mense selfverdediging te leer,” voeg die akteur by. En wat is beter as om mense te verenig met die vaardigheid en vertroue om mekaar te beskerm?
EER DIE LEIER
Zak sê dis ’n storielyn oor hoop. “President Mandela het die wêreld geïnspireer. Werner probeer dieselfde oortuiging in mense kweek: Om hulle goed oor hulself te laat voel, en om veilig op straat te voel.
So, pleks van ’n braai vir Mandeladag wil Werner iets konstruktiefs doen en ’n selfverdedigingsklas sal mense op so baie maniere help,” sê Zak. “Die gemeenskap is die hoeksteen van 7de Laan.”
Maar net een man kan nie ’n verskil maak nie, daarom nader Werner sy vriend Denzil (Jaques da Silva) om hulp. “Denzil is soos Werner: Hulle het ’n hart van goud en kan met mekaar vereenselwig. Hulle is omtrent ewe oud, en is positief.” Dit help ook dat Denzil die plaaslike koffiewinkel Oppiekoffie besit, en een ding is seker van Hillside – as jy wil hê mense moet van iets weet, is Oppiekoffie die plek om die nuus te versprei. “Die mondelinge nuus strek ver en Werner is verras wanneer so baie mense vir die klas opdaag,” sê Zak.
VERLEDE KEER
Augusta het Ivy voor stok gekry oor haar geskinder oor Werner, die ma en dogter Mariaan en Amorey het hul band versterk, en die babawagters Romeo en Khethiwe is deur Eddie en Karmen uitoorlê.
IN DIÉ UITGAWE
Aankondigings oor die skoonheidskompetisie maak Shady gespanne, die Welmans kan uiteindelik hul probleme opsyskuif vir ’n klein gesinsviering, en Mariaan kan nie haar vreugde verberg wanneer Ivy ’n bloutjie loop nie.
Die dorp gons wanneer die nooddiens na The Heights-woonstelkompleks ontbied word, Marvin en Ivy stem nie saam oor hul kinders se dissiplinering nie en dit veroorsaak probleme vir die ouerpaar, en Werner vra
Denzil se hulp met sy selfverdedigingprogram as deel van Hillside se Mandeladag-vieringe. Mariaan vertel haar skoonseun, Fikani, van haar kinderjare en haar pa, en Zelda kom terug om vir haar suster Mariaan en swaer Chris op hul huweliksherdenking te sing.
Uys flankeer met Mieke wanneer hy haar in die koffiewinkel Oppiekoffie raakloop, en
Ivy bel haar ma (nie op die skerm nie) vir raad oor haar argumente met Marvin. Marvin is nie beïndruk met sy seun Eddie se wangedrag nie, en Augusta het die oog van ’n vryer gevang. Mariaan het ’n ligte ineenstorting wanneer haar dag sleg verloop, en Denzil vertel Ivy hy hou van haar planne om Oppiekoffie weer winsgewend te maak.