Gesondheid, Prontuit
Seisoen 3 VIA (*147) 18:00 Geselsprogram
Die laaste van die regulasies vir die Covid-19-pandemie is einde Junie in Suid-Afrika opgehef, waaronder die verpligte dra van maskers. Dit voel vreemd om sonder ’n masker te loop, en baie mense wonder of ons gereed sal wees om nóg ’n vlaag van die koronavirus, of selfs ’n nuwe pandemie, te trotseer.
Dr. Rust Theron, ’n mediese dokter en aanbieder van die geselsprogram Gesondheid, Prontuit, meen ons is goed voorbereid op enige scenario. “Die eerste vlaag van Covid-19 het die departement van gesondheid en hospitale landwyd hard getref. Maar soos dinge nou lyk, glo ek ons is beter voorbereid met nuwe regulasies by hospitale, prosedures en voorkomingsmiddels, soos inentings.”
Dr. Theron begin die derde seisoen van Gesondheid, Prontuit deur te fokus op die newe-effekte en behandeling van lang Covid-19, soos hy daarna verwys (episode 1, 13 Julie). “Hoewel die nuutste Covid-variant jou nie doodmaak nie, is sy effek langdurig en kan jy vir tot ’n jaar nadat jy dit gehad het, nog met uiterste moegheid sukkel. In ernstige gevalle kan mense se longe selfs onherroeplike skade opdoen,” verduidelik hy.
Ander sake wat in seisoen 3 bespreek word, sluit in: diabetes tipe 1 (episode 3, 27 Julie), hipertensie (episode 4, 3 Augustus), hartversaking (episode 5, 10 Augustus) en orgaanoorplanting (episode 6, 17 Augustus). Dr. Theron sê kykers se terugvoering oor die eerste twee seisoene was wonderlik en baie mense het gesê hulle het vir toetse en behandeling gegaan vir siektes waarvan hulle op die program gehoor het. “Dit maak alles die moeite werd,” sê hy. “Die reeks werk, want ons het pasiënte met eerstehandse ervaring van siektes en hulle vertel daarvan: Hoe hulle die ergste oorkom het, of hoe hulle steeds daarteen stry. Vir meer kan ek nie vra nie.”