Soos mis voor die eilandson . . .
Bobby van Jaarsveld is in die splinternuwe Spoorloos-reeks met ’n boeiende misterie.
Spoorloos: Die Eiland
Seisoen 4 Dinsdae kykNET (*144) 20:00 (begin 19 Julie)
Dis weer hier! ’n Nuwe seisoen van die naelbyt-dramareeks Spoorloos, en dit beloof om selfs meer raaiselagtig as die eerste reekse te wees.
Spoorloos: Die Eiland is nes die vorige seisoene, Spoorloos (seisoen 1) Spoorloos: Heksejag (seisoen 2) en Spoorloos: Steynhof (seisoen 3), wat op die aanlyn stroomdiens Showmax beskikbaar is, ’n losstaande spanningsverhaal van agt episodes.
“Soos met die vorige seisoene is daar weer iemand wat spoorloos verdwyn, en die kykers gaan weer lekker kopkrap om die raaisels op te los. En net soos met die vorige stories is daar ’n paar onverwagte wendings wat die spanning tot op die laaste oomblik hoog gaan laat loop,” sê die hoofskrywer van die reeks Ilse van Hemert.
Die sanger Bobby van Jaarsveld, wat ook die sangkompetisiereeks Die Kontrak aangebied het, staan in die skoene van die hoofkarakter Stefan Claasen wie se lewe handomkeer verander. En niks kan ooit weer die dieselfde wees tot hy by die waarheid uitkom nie.
WAT JY KAN VERWAG
Stefan is ’n passievolle argitek met ’n avontuurlustige gees. “Hy is ’n goeie ou en wil nie mense seermaak nie,” sê Bobby. “Ongelukkig word hy in duistere omstandighede gedompel en hy sal enigiets doen om daaruit te kom en sy onskuld te bewys.”
Hierdie duistere omstandighede het te doen met Emma Eloff (Izel Bezuidenhout, die jong Anna in die film Dis ek, Anna), ’n vrou wat hy jare gelede terwyl hy nog gestudeer het by
’n koffiewinkel ontmoet het waar sy ’n kelnerin was. Stefan was halsoorkop verlief op Emma, maar sy het eendag soos ’n groot speld uit sy lewe verdwyn. Jare later, terwyl Stefan op pad is na ’n belangrike vergadering vir ’n projek wat hy hoop sy maatskappy sal losslaan, hou hy stil langs die pad om ’n vrou te help wie se motor gaan staan het. Die vrou? Emma, natuurlik!
Al die gevoelens wat hy vir Emma gehad het, word weer binne hom wakker, al is hy nou verloof (lees meer onder). Maar kort nadat Stefan Emma gehelp het, verdwyn sy weer soos mis voor die eilandson . . . Nou word Stefan se lewe net moeiliker, want selfs die polisie dink hy is vir haar verdwyning verantwoordelik! En dan is daar nog sy seun vir wie hy moet veg, en Emma se man wat ook wonder waar sy is.
’N DROOMROL
Die rol van Stefan is Bobby se eerste ernstige rol op TV en hy is trots daarop. “Ek het al TV-aanbieding gedoen, so ’n bietjie komedie (as Rossouw Breytenbach in die komediereeks Mense Mense), en musicals met die rolprente Liefling: Die Movie (2010) en As Jy Sing (2013), maar nog nie iets soos dié nie,” vertel hy.
WEES OP DIE UITKYK Die aktrise Zetske van Pletzen (Julia in die sepie Getroud Met Rugby, lees meer op bl. 23 en 47) verskyn as gasspeler in die rol van Kyle. “Sy is ’n Franse korrelkopnavorser en maak seker die karakters kan veilig in die see gaan met haar haai-afweringstelsel. Dis baie doeltreffend – solank dit aan ’n kragopwekker gekoppel is,” sê die hoofskrywer Ilse.
Bobby en sy gesin het ál die vorige seisoene van Spoorloos gekyk en was uit die staanspoor vasgevang in die stories, en hy verstaan waarom dit so gewild is. “Dit gryp jou aandag en hou dit. Om in Spoorloos te speel, is ’n droomrol en ek is dankbaar en bevoorreg ek kon die geleentheid kry,” sê Bobby.
Die grootste uitdaging in sy vertolking van Stefan was al die emosies wat die arme man ervaar. “Dis intens. Hy moes ’n paar keer huil en beleef moeilike omstandighede, maar ek dink ek het dit uiteindelik met die hulp en raad van die regisseur en my medeakteurs reg oorgedra, en kykers sal dit in my toneelspel sien.”
DIE LIGGING
Ilse vertel die inspirasie van die eilandligging spruit uit haar kinderdae.
“Ek het grootgeword op ’n eiland in die St. Lucia-riviermonding waar my pa haainavorsing gedoen het. Ek wou nog altyd ’n reeks op ’n eiland laat afspeel – of ten minste gedeeltelik, want dis ’n peperduur droom,” voeg sy by.
Spoorloos: Die Eiland speel af op die fiktiewe Stedler-eiland, suid van Madagaskar en wes van Durban. “In werklikheid is tonele vir die reeks langs die kuslyn in KwaZulu-Natal en op plekke in Johannesburg verfilm,” sê die regisseur en vervaardiger Christo Davids, wat ook by die vorige twee seisoene van Spoorloos betrokke was.
Danksy Ilse se kennis van haar pa se navorsing oor haaie duik dié gevreesde visse ook in die storielyn op. “Ek kan nie nou te veel daaroor uitlap nie, maar wat ek wel kan sê is een van ons grootste uitdagings tydens die verfilming van die produksie was beslis om op see te skiet,” sê Christo. “Niemand kan die currents werklik voorspel nie.”