Bewonder & Bewaar Met Bonné De Bodd
Seisoen 1 Sondae kykNET (*144) 20:00 Herhaling Dinsdae 21:30 Natuurprogram
Natuurbewaring is vir Bonné de Bodd ’n passie wat haar baie na aan die hart lê. In die nuwe natuurprogram Bewonder & Bewaar Met Bonné De Bodd vaar dié TV-persoonlikheid, bewaarder, en filmmaker die ongerepte wildernis van SuidAfrika, Namibië en Argentinië in en gesels met kenners en navorsers wat werklik ’n verskil in die natuur maak. “Hul pionierswerk is op die voorpunt van bewaring,” sê Bonné wat ’n veldaanbieder (2010-2016) in Suid-Afrika se oudste natuurprogram, 50/50, was. Die 11de seisoen word tans op Maandae om 19:00 op SABC2 (*192) uitgesaai.
“Ons wys programme en instansies wat woestynleeus in die Namib-woestyn ondersoek, pikkewyne op Dasseneiland in die Atlantiese Oseaan, en poemas in Argentinië,” vertel Bonné. Daar is 13 episodes waarvan 4 (episodevolgorde is nog nie afgehandel nie) gewy word aan die Krugerwildtuin en die lofwaardige werk van veldwagters, veeartse en navorsers met olifante en wildehonde,” sê Bonné.
Daar is talle uitdagings in die maak van ’n natuurprogram wat die werk kan vertraag. “Met dié reeks was die red
tape om in die Patagonië-natuurpark in Argentinië te verfilm uiters frustrerend. Die pandemie was ’n probleem, want ons is minute voor ons in November na Argentinië sou vertrek, weggewys toe die Omikron-variant in SA gevind is. Ons kon eers in Februarie gaan.” Stormwinde en hitte het ook verfilming bemoeilik.
Bonné sê om ’n verskil in die natuur te maak, kan jy die gesprek oor bewaring lewendig te hou – veral op die sosiale media. “En na programme soos dié kyk en dit ondersteun,” voeg sy by.