AGTER DIE SKERMS
Met 7de Laan en Legacy in sy arsenaal, ken André die lewe op stel goed. Hy sê toe hy in April by GMR inval, was dit ’n heel nuwe ervaring, maar ook ’n bekende een. “GMR word verfilm by dieselfde ateljee waar die sepie Villa Rosa (2004-2016) verfilm was,” sê André wat die rol van die boosaard Liam le Roux in Villa Rosa vertolk het. “Dit was heerlik om weer op daardie stel te wees en nuwe en ou gesigte te sien. Elke stel en produksie het sy eie unieke vibe en manier van doen, maar wat GMR vir my spesiaal maak, is die vryheid wat die regisseurs aan die akteurs gee om meer met hulle karakter te speel en te improviseer waar nodig.”
Markus, wat in 2019 by 7de Laan klaargemaak het – al het Willem sporadies in die Laan opgedaag – se lewe het intussen drasties verander.
“Ek wou oor die wêreld toer, maar my planne is in 2020 deur die pandemie in die wiele gery,” sê Markus wat toe later eerder Suid-Afrika gaan verken het soos die Wildekus in die Oos-Kaap en Kosi Baai in KwaZulu-Natal.
“Ek het geleer hike, duik en het
’n vegan geword,” sê Markus wat ook intussen opleiding gedoen het as ’n brandweerman en onlangs sy kwalifikasie voltooi het. “Ja ek is ’n brandweerman,” sê hy trots. Maar gaan hy nog toneelspeel? “Verseker,” sê hy. “Wanneer die tyd reg is, gaan ek moontlik na die Kaap verhuis waar daar goeie geleenthede vir brandweermanne en akteurs is.”
Francois is ’n man wat met sy hande werk en toe sy kontrak in Augustus 2021 by 7de Laan nie hernu is nie, het hy dadelik in sy werkswinkel gaan werk en bestuur nou ’n suksesvolle besigheid waar hy meubels, koffietafels en selfs messe maak vir kliënte. “Ek is dol daaroor om dinge te maak,” sê Francois. “Dis ’n ander manier hoe ek my kreatiwiteit kan uitleef.” Hy was juis besig om met sy hande te werk toe hy die oproep kry om vir drie maande by GMR te werk.
Reynard sê hy het elke minuut by GMR geniet al moes hy aanpas by die produksietempo en hordes woorde vir elke toneel leer. “Dis nie vir sissies nie,” sê hy ernstig. Tans is hy nog betrokke by Bravo! en gaan later vanjaar ’n beoordelaar by die FAK Allegrettotoneelfees wees.