Binnelanders
Weekdae kykNET (*144) 19:30 Sepie
Die band tussen verpleegster Gaby (Maude Sandham) en die sakeman Rian (Erik Holm) het die afgelope tyd verstewig. Dit het haar kêrel, dr.
Uys (Gerald Steyn), omgekrap omdat Gaby haar probleme eerder met Rian bespreek as met Uys.
Gaby en Uys se paadjies het geskei nadat Gaby besef het Rian was verantwoordelik vir die gedig en liefdesbriefies wat Uys aan die begin van hul verhouding vir haar gestuur het. “Rian het Uys gehelp om Gaby se liefde te wen,” sê Erik. “Rian het eers later, toe hy terugdink aan wat hy geskryf het, besef hy voel dalk meer as vriendskap vir Gaby,” vertel Erik. Maar dinge het verander en nou broei iets tussen Rian en Gaby!
“Rian besoek Gaby in haar woonstel en hulle praat openhartig,” sê Erik. “Albei erken hulle voel iets vir mekaar, maar is bang as hulle dié gevoelens verken, ly hul vriendskap.” Hulle stem nietemin in tot ’n verhouding. Intussen hoor Uys van hul romanse. “Rian voel hy skuld Uys ’n verskoning, want die ding tussen hom en Gaby was nie beplan nie. Uys aanvaar sy verskoning en wens hulle die beste toe,” vertel Erik.
Tertius (Reynardt Hugo), Gaby se halfbroer, en Rian gesels later oor Rian en Gaby se romanse. Tertius gee sy seën en maan Rian sy kan ’n handvol wees. “Tydens hul gesprek kry Tertius ’n oproep uit Australië waar sy eksvrou, Daleen (Desiré Gardner, Carmen in Suidooster, lees meer op ble. 26 en 27) en sy kind
Nina (Le-Anche van den Berg) bly. “Ek mag nie sê wat die krisis is nie, maar Rian gaan Tertius help,” sê Erik. • Lees meer op ble. 22 tot 24.