Guy! Hawaiian Style
Seisoen 1 Food Network (*175) 19:55 Leefstyl
Die glanssjef Guy Fieri is altyd gereed vir nóg ’n avontuur veral as dit wilde nuwe bestemmings en borde vol kos insluit. En vir sy nuutste program breek hy weg van sy realiteitkompetisiereeks en neem sy gesin met vakansie na die Hawaise eilande! “Indien Hawaii dit aanbied, probeer ons dit,” sê Guy, wat die eiland se kultuur en kookkuns verken saam met sy vrou, Lori, seuns Hunter en Ryder, en neef Jules in die reeks van vier dele getitel Guy! Hawaiian Style.
Die Fieri-gesin neem tydens die vakansie van 20 dae deel aan aktiwiteite soos skubaduik, kleiduifskiet in ’n ou vulkaan, en kry selfs tradisionele tatoes. “Ons doen alles, of dit nou op land of op see is. En boonop kan kykers meedoen aan hierdie ongelooflike reis,” sê die 54-jarige Guy. “Hierdie reeks verskil van ander reekse wat kykers al gesien het, want dit gaan nie oor kos nie – dit gaan oor gesin en familiebande.” En die sjef voeg by hy is ’n ander mens saam met sy geliefdes as hoe hy alom bekend is. “Ek is steeds eksentriek, my hare is eksieperfeksie en ek het daardie skreeusnaakse slagspreuke, maar my geaardheid is anders wanneer ek by my gesin is.”
Daar is hope kos op die program, maar Guy is nie hierdie keer in sy rooi motor met die afslaankap wat beroemd geraak het in Diners, Drive-ins &
Dives nie, en wat sedert 2010 verskeie episodes in Hawaii geskiet het. Hy neem sy gesin om verskillende soorte kos, van eksoties tot tradisioneel, te beproef. “Daar’s niks beter nie as ’n paar biere, ’n tiki-vuur op die strand met pynappel en die beste vis nóg,” sê Guy. “Ons wys Hawaii vir die kykers – en vir my – op ’n manier wat hulle nog nie gesien het nie, en dis wat die reeks so fantasties en anders maak as enigiets wat ek al voorheen gedoen het – en dis warm, warm, warm!”