Iets heeltemal anders
Netflix loods sy eerste Afrikaanse dramareeks met Hollywood se Arnold Vosloo in die hoofrol en ’n sterbelaaide plaaslike rolverdeling wat ’n storie vertel wat werd is om te kyk.
Die gehalte van die produksies van flieks en reekse tot dokkies wat in Suid-Afrika verfilm is, het deur die jare beduidend verbeter, en in Augustus het die aanlyn stroomdiens Netflix die geleentheid gebruik om sy eerste Afrikaanse dramareeks, genaamd Ludik, in ses dele beskikbaar te stel.
Dit spog met die Suid-Afrikaanse Hollywood-ster Arnold Vosloo (kapt. Johan Langerman in die Afrikaanse Netflix-fliek Silverton Siege). Ludik is ’n skop-skiet-en-donder-drama met ’n sterbelaaide plaaslike rolverdeling wat kykers gaan verras. En dis beslis ’n kettingkyk werd!
“Dit beteken die wêreld vir my om in my geboorteland terug te wees en te werk,” sê Arnold oor die verfilming hier in Suid-Afrika. “Ek het my spel nou vir meer as 40 jaar geslyp en dit beteken vir my baie om dit hier toe te pas en waarde te voeg tot die produksies waarby ek betrokke is.” En tussen die omarming van sy Afrikaanse aksent, vuishoue plant en in gevaarlike situasies beland, lewer Arnold ’n onvergeetlike optrede as die reeks se hoofkarakter Daan Ludik. Hier is alles wat jy moet weet oor dié treffende reeks!
RAAK GEMAKLIK
Vir buitestanders lyk Daan Ludik soos ’n suksesvolle Pretoriase sakeman wat weelderige meubels en matte verkoop in sy onderneming Ludik Furniture.
Die maatskappy se slagspreuk ‘raak gemaklik’ klink lekker, want jy dink jy sal redelik gemaklik raak op een van sy voortreflike rusbanke. Maar daar is min wat gemaklik is aan
Daan. Die onderneming is ’n front vir diamantsmokkelary en een dag word alles waarvoor Daan gewerk het en wat hy liefhet in gevaar gestel wanneer sy swaer Swys (sien langsaan) ontvoer word en Daan onwillekeurig by onwettige vuurwapenhandel ingetrek word. Arnold sê Daan is ’n baie komplekse karakter. “Soos ek veronderstel ons almal is. ’n Hardegat, maar billike man. Hy word aangespoor deur geld, want geld gee hom sekuriteit en die vermoë om na sy wanfunksionele familie om te sien.”
DIE ANTAGONIS
Saam met Arnold speel nóg ’n SuidAfrikaans gebore internasionale ster Sean Cameron Michael (Harold Vermeer in die aksiereeks Die Byl) die hoofantagonis Arend Percival Brown.
“Arend is Iers, maar hy kan ook ’n bietjie Afrikaans en Russies praat,” sê Sean. “Sy regte naam is Percival, maar sy plaaslike medesamesweerders het hom die bynaam Arend gegee, want hy sweef bo sy koninkryk van verderf. Hy is ’n hoogs suksesvolle, maar oneerlike sakeman wat Suid-Afrika sy tuiste gemaak het, en is diep betrokke by die ondergrondse Mafia wat die land beheer. Dié grootbaas is gevaarlik en Daan Ludik word onwilliglik ’n pion in Arend se meesterplan om sy sindikaat oor die vasteland uit te brei,” terg Sean.
Reg deur die reeks stamp Daan en Arend talle keer koppe en dis duidelik net een gaan die spel wat hulle speel oorleef. Maar dis nie al nie.
Jy kan ook uitsien na verskeie terugflitse wat in 1979 plaasvind toe Daan ’n seuntjie was. Destyds was hy
reeds ’n bedrewe entrepreneur, wat die man wat hy geword het, beïnvloed het. “Vanaf ’n jong ouderdom het Daan die skynheiligheid gesien van wat sy pa [sien op die vorige bladsy] in en met die kerk gedoen het, en hy het gesien God vat sy ma weg. Hy het gevoel hy moes opstaan en vir sy familie sorg, en die een manier waarop hy dít kon doen, was met geld,” verduidelik Arnold.
DIE OWERHEDE
Soos die transaksies tussen Arend en Daan voortdurend die aandag van die owerhede lok, en veral dié van brigadier Errol Davies (Zane Meas, Brandon Daniels in die sepie Binnelanders, lees meer op ble. 24, 25 en 45). “Davies is ’n gehoorsame polisiebeampte wat daarop ingestel is om die raaisel van Daan Ludik en die verdagte aktiwiteite
rondom sy besigheid op te los en een van sy meubelvragmotors wat die grens na Zimbabwe oorsteek vas te trek,” sê Zane. “Hy het die aanvoeling vir dié soort ding en sal nie ophou voor hy al die antwoorde het nie. Hy’s ’n goeie ou met goeie voornemens, maar sy persoonlike lewe is vol foute.”
Zane voeg by dit was ’n wonderlike projek om saam met Arnold te werk. “Ons het ’n paar jaar gelede ’n lekker fliek genaamd Forgiveness (2004) saam gemaak en het tydens die verfilming goeie vriende geword. Hy het my self gebel om te vra om dié rol in Ludik te speel. Hoe kon ek nee sê? En die vonk is steeds daar. Hy’s ’n fantastiese en goeie ou. En baie oop vir idees. As ’n kunstenaar por hy altyd aan en daag hy uit. Jy kan nie verkeerd gaan as jy teenoor Arnold Vosloo toneelspeel nie.”