Geteister deur trolle
Shady se groot wen in ’n skoonheidskompetisie is nie sonder drama nie wanneer trolle aanlyn haar waardeloos wil laat voel.
Dit was ’n moeilike besluit vir Shady (Beáta Bena Green) om vir die Mej. Goue Stad-skoonheidskompetisie in te skryf. “Sy het nog altyd met selfvertroue gesukkel, en toe sy na Hillside kom, het sy oor begin. Sy het ’n tweede kans op ’n normale lewe gekry met haar verlede wat in haar tuisdorp agtergebly het. Dit was haar tyd om weg te kom van die skoolboelies in Port Elizabeth,” verduidelik die aktrise. Maar Shady se probleme het haar nie net na 7de Laan gevolg nie – hulle het vermeerder weens trolle aanlyn tydens die skoonheidskompetisie!
KYK HOE LYK SY
Shady se trolle plaas aaklige kommentaar aanlyn tydens die kompetisie. Die dreigemente stel haar nie in gevaar nie, maar die woorde is gemeen en wreed. “Sy neem ter wille van haarself aan die kompetisie deel en dié trolle se kommentaar is ‘sy’s te maer’, ‘sy’s nie mooi genoeg nie’, dit, dat en wat nog. Shady lyk selfversekerd en vreesloos, maar dis ’n front.” Beáta verduidelik haar karakter is deur die mense wat haar die meeste liefhet en ondersteun aangespoor om in te skryf, maar sy het nooit gedink sy sou wen nie. Die trolle het ’n sensitiewe plek aangeraak. “Sy gaan deur iets traumaties, sy veg heldhaftig terug en hoewel sy nie die trolle gaan laat wen nie, twyfel sy oor hoe ver sy gekom het,” sê die aktrise oor haar karakter wat aan die skoonheidskompetisie deelneem om te voel sy het genoeg selfvertroue en selfliefde.
DIE GROENOOGMONSTER
Beáta verstaan wat haar karakter ervaar (lees meer langsaan), maar Shady het nooit kon dink haar verlede gaan haar kom teister tydens die kompetisie nie. “Sy was geskok toe sy by die geleentheid kom, want die meisie wat haar op skool geboelie het, was ook daar – Samantha Stoffels (gespeel deur Beáta se werklike suster Tshidi, wat saam met Beáta aan skoonheidskompetisies deelgeneem het toe hulle jonger was). “Sam was Shady se hoofmededinger en Shady moes twee keer kyk toe sy Samantha sien. Dis asof sy een tree vorentoe gee in die lewe, dan drie treë teruggedwing word. Dis nie regverdig nie,” voeg Beáta by.
SINK OF SWEM
Hoewel Shady stres verduur weens die trolle se gemene kommentaar, doen sy haar bes om die mas op te kom op die enigste manier wat sy ken. “Sy krop dit alles op. Sy voel in werklikheid verleë oor die situasie en wil nie die aandag na haar óf die trolle trek nie,” verduidelik Beáta. Die probleem is daardie soort stres en seer bou op, sê die aktrise. “Sy’s soos ’n drukkoker, sy hou aan kook, maar blaas nie stoom af nie. ” En hoewel Shady weet sy is nie perfek nie, gaan sy ’n standpunt inneem. “Die trolle gaan haar emosioneel seermaak, maar sy is deur so baie, ek dink sy gaan sterker aan die ander kant uitkom. Ek dink nie sy gaan op die lang duur verslaan word nie,” sê Beáta, en sê aan die kykers “trolle is nie gawe mense nie. Indien jy voel jy word aangeval, praat, en kry hulp!”