Binnelanders
Weekdae kykNET (*144) 19:30 Sepie
’n Ma is belangrik in ’n kind se lewe en vir Vicky (Roxanne Bornman) wie se eie ma (nie op die skerm nie) en tannie Elana (Ilne Nienaber) albei die afgelope twee jaar oorlede is, is dit nie maklik nie. Sy en haar ouer broer,
Ruan (Caden Bouwer) is gelukkig by dr. Steve (Clint Brink), Elana se verloofde, wat Vicky en Ruan aangeneem het. Maar sy mis ’n ma en wanneer Vicky ’n gemoedelike gesprek tussen Steve en hul familie-vriendin Tracy (Melinda Viljoen) sien, kry sy ’n plan om vir oom Steve en dié tannie Kupido te speel. “Tracy is baie lief vir Vicky en Ruan en sedert sy en Steve hul verskille opsygeskuif het, geniet sy dit om tyd saam met die kinders te bestee,” sê Melinda.
Vicky vra Tracy of sy van Steve hou. “Tracy besef nie wat Vicky se doel is nie en sê hulle is almal vriende,” sê Melinda.
Vicky het sterre in haar oë wanneer sy haar rokkie vir die komende ma-endogter-modeparade by haar skool vir Steve en Tracy wys tydens ’n fotosessie wat Tracy gereël het, want Tracy gaan saam met haar. “Vicky probeer Steve sover kry om Tracy se uitrusting vir die modeparade te komplimenteer,” sê Melinda. Dit maak Tracy ongemaklik, veral wanneer Vicky aandring Tracy moet saam met hulle vir ’n gesinsfoto poseer . . .
Vicky is vies wanneer sy sien hoe haar oom Conrad (Hykie Berg), Tracy se kêrel, Tracy vra om uit te gaan. “Vicky nooi Tracy kort daarna na hul huis vir ete, maar wanneer Tracy opdaag, is dit net sy en Steve wat aansit – Vicky het spore gemaak. En dís wanneer Tracy en Steve besef wat aangaan.” • Lees meer op ble. 24 en 25.