Extraordinary Humans
Seisoen 1 Curiosity Channel (*185) 22:00 Realiteit
Wetenskaplike feite klink soms soos wetenskapsfiksie, en dís iets wat die bioloog Thom Hunt in sy reeks Extra-ordinary Humans ondersoek. “Ek verstaan biologie. Ek verstaan wetenskap. Maar wat ek in hierdie program sien en met mense ervaar, is onverklaarbaar,” sê die Britse aanbieder van iets in die 40. “Ons bekyk dié mense van naderby en probeer hul bonatuurlike eienskappe verduidelik. Ons kyk na iemand soos Biba Struger, ’n man van Serwië wat nie doodgeskok kan word nie. Hy hanteer elektrisiteit op ’n manier wat ons nie kan verklaar nie.”
Dis egter nie so maklik om so ’n reeks te maak nie. “Ons het meer as 4 000 inskrywings van reg oor die wêreld gekry en moes elkeen ondersoek om te sien of dit waar is,” sê Thom. “Ons was taamlik gelukkig, want bykans die helfte van die video’s het die mense op ons potensiële lys uitgesluit – wat hulle as buitengewoon beskou het, was nie. Daar was ’n ou wat op ’n trampolien gespring het. ”
Thom en sy span het na 20 lande gereis om die buitengewone mense te ontmoet en dit was al die visum-regulasies en lewe op die pad werd. “Ek kan steeds die helfte van die goed wat ons gesien het, nie verduidelik nie. Daar’s ’n ou oor wie ’n lorrie gery het. ’n Normale mens sou vergruis gewees het, maar hy het besonder digte spiere en bene wat ’n bykans metaalagtige geraamte vorm.” Die mense in die reeks is deur dokters, wetenskaplikes en ander genetika-spesialiste getoets om hul vermoëns te bewys. Thom vertel: “Hulle het toetse ondergaan om seker te maak hulle is 100% werklik. Wat ook al jy in die reeks sien, is waar . . . hoewel byna onmoontlik om biologies te verklaar.”