Ambisie, hebsug en melodrama DIE EIKESTAD
’n Familiedrama wat in die IT-bedryf en bankwese afspeel.
Fraksie
Seisoen 1 Dinsdae kykNET (*144) 20:00 (begin 13 September)
Fraksie is ’n splinternuwe, boeiende dramareeks uit die stal van die vervaardigers Louis Pretorius en Albert Snyman wat trefferreekse soos Die Boekklub, Fynskrif en Troukoors vervaardig het, en speel af teen die agtergrond van die bankwese en tegnologiese wêreld. “Hoewel die sakewêreld die ruggraat van die storie is, is dit nie die enigste tema nie. Die verhoudings tussen familielede en vriende en al die onderstrominge word ook ontgin,” vertel Louis. “’n Goed bewaarde geheim tussen drie goeie ou skoolvriende Schalk (Edwin van der Walt, Wian in die reeks Fynskrif), Jana (Trix Vivier, Petra in die telenovelle Legacy, lees meer op bl. 32) en Tim (Marlo Minnaar, Aiden in die dramareeks Sara Se Geheim) word soos ’n goue draad reg deur die storie verweef en bind die drie hoofkarakters saam,” verklap hy ’n bietjie meer van die storielyn.
Die vonk vir Fraksie het begin toe kykNET die vervaardigers verlede jaar genader het om ’n nuwe reeks te maak in dieselfde trant as Vallei Van Sluiers, wat oor ’n familie en vrugteboere gehandel het. “Ons het besluit om die reeks in Stellenbosch te laat afspeel, maar wou wegbreek van die tema van wynplase omdat dit al voorheen gedoen is. Stellenbosch was ’n goeie vertrekpunt vir Fraksie omdat dit so ’n bietjie soos Sillicon Valley in Amerika is: ’n Roemryke geskiedenis en tradisie van ‘ou geld’ en talle rekenaarmaatskappye wat daar gesetel is,” vertel hy. Die meeste van die tonele is in en om Stellenbosch verfilm, maar ook in omliggende gebiede soos Franschhoek en Somerset-Wes.
TEKS EN ROLVERDELING
Albert en Louis het die oorspronklike konsep ontwikkel en daarna het Louis, die hoofskrywer, twee weke lank saam met ’n skryfspan die oorhoofse storie uitgewerk en die verhaal in 17 episodes opgedeel. “Die episodes word aaneen uitgesaai, maar is as ’t ware twee hoofstukke of minireekse,” verduidelik Louis.
“Die eerste agt episodes wys hoe die maatskappy QPI (Quick Payment Interface) opgebou word en die laaste nege episodes vertel hoe die onderneming en die mense wat daarby betrokke is, verder ontwikkel.”
Melt Sieberhagen (Nathan in die reeks Troukoors), Rosalind Butler (skrywer van die reeks Home Affairs) en Stephen Simm (skrywer van die reeks iNkaba) het saam met Louis aan die teks geskaaf. “Dit was ’n heerlike ervaring om met so ’n ervare span skrywers te werk en hulle het my soms uit my eie eggokamertjie geneem.”
Louis sê wanneer hy ’n karakter skep en skryf, doen hy dit nie met ’n spesifieke akteur in gedagte nie. “Ek skryf die karakter soos hy is.