Troumateriaal
Christi Panagio soek die beste trouvrou op die kassie.
“Die program is ’n sosiale eksperiment. Ons is nuuskierig en wil ’n eenvoudige vraag beantwoord: ‘Hoe lyk vandag se Afrikaanse trouvrou?’” sê Nini Conradie, vervaardiger van die realiteitreeks Houvrou Of Trouvrou, wat einde September op VIA begin. “Ná afloop van die verfilming kan ons beslis sê die antwoord op die vraag is interessant, en ook onverwags,” verklap Nini.
En met die aktrise Christi Panagio wat die skoene van die aanbieder volstaan, ’n paneel van beoordelaars, agt gretige deelnemers wat wil bewys hulle is troumateriaal, plus R500 000 op die spel, kan ons ook nie wag om meer te sien nie!
CHRISTI IS TERUG
Christi het kykers se harte in die vroeë 2000’s gesteel toe sy die rol van Karien Momberg in die sepie 7de Laan (lees meer op ble. 26 en 27) vertolk het. Haar liefdesbelangstelling was die aantreklike sakeman
George Kyriakis (Nico Panagio, die aanbieder van Survivor: SA). Hulle het in die ware lewe ook op mekaar verlief geraak en later getrou. Christi het ’n ruk lank opgehou toneelspeel, maar nou is sy weer voor die kamera – al is dit as aanbieder. “It’s
been a while,” sê Christi laggend oor haar tyd weg van die kassie. “My side
hustle is grafiese ontwerp, asook ’n paar ander kreatiewe projekte, maar my grootste verantwoordelikheid tans is my kinders (wie se identiteit sy privaat hou), aangesien ek hulle in dié stadium tuis onderrig.”
Christi is ’n voorbeeld van ’n uitstekende trouvrou, en daarom is sy as aanbieder gekies, sê Nini – met Christi wat sê dis ’n eer om so beskryf te word. “Namate die tyd aanstap, groei ’n mens beslis in wysheid en ervaring,” sê Christi.
“Daar is wel altyd meer om na te streef, so ek sal altyd ’n work in progress bly. Ek dink egter as ek een van die deelnemers was, sou ek heel goed vaar in elk van die uitdagings,” sê sy.
DIE UITDAGINGS EN DIE PANEEL
In elk van die 10 episodes gaan die 8 deelnemers twee uitdagings aanpak. Nini verduidelik: “Elk van die deelnemers kry daagliks ’n geleentheid om hulself in fisieke uitdagings te bewys. Hierdie uitdagings is ontwerp om die deugde wat kenmerkend aan ’n moderne trouvrou is, te toets. Voorbeelde van hierdie deugde sluit in: Sy moet ’n goeie versorger wees; selfstandig wees; en sy moet ’n kop vir geld hê. Elke dag hou ’n klein én ’n groot uitdaging in. Die wenner van elke dag se klein uitdaging slaan ’n strategiese voordeel los vir die dag se groot uitdaging. Hierdie voordeel kan enigiets wees, van ekstra tyd in die groot uitdaging of die kans om jou spanmaats te kies.”
’n Paneel kenners beoordeel die uitdagings en hulle sluit in die koningin van etiket Emsie Schoeman, radio-omroeper Sherlin
Barends en die lewensafrigter Bauke Hanekom. “Tannie Emsie is op die uitkyk vir goeie maniere en tradisionele waardes. Sherlin verteenwoordig die stem van die uitgesproke feminis en Bauke die mening van die jong, Afrikaanse enkellopende man,” sê Nini.