Shady se gedrag pla
Wees versigtig, Shady . . . jy vervreem almal!
Daar is tye wanneer ’n vrou verlief raak en skielik maak niks anders saak nie – dis net sy en die nuwe liefde van haar lewe. Hoewel dit aanvanklik oulik lyk, word dit gou toksies wanneer jou vriende heeltemal uitgesny word en die mense wat jou voor die verhouding ondersteun het, eenkant toe geskuif word. Dis presies wat Bonita (Hildegardt Whites) dink gebeur met haar susterskind, Shady (Beáta Bena Green).
Shady het besluit dit gaan haar beste jaar wees. Sy het tog onlangs ’n skoonheidskompetisie gewen, en sy het ’n ou,
Jermaine (Adrian Steyn), ontmoet en dink hy is haar ridder op die wit perd. “Shady en Jermaine se verhouding vorder vinnig, hulle het saamgeslaap nadat hulle mekaar ’n kort rukkie geken het, maar hulle meen hulle het ’n sterk band. Shady voel dit is reg en veral ná so ’n woeste jaar waarin sy haar vriend Shawn (Deànré Reiners) verloor het,” sê Beáta. Maar is dit ’n gesonde verhouding?
BEKOMMERDE TANTE
Shady se tante, Bonita, is bekommerd oor haar susterskind se nuwe verhouding en die pas waarteen dit vorder. “Shady het halsoorkop op Jermaine, die nuwe kelner by Oppie’s, verlief geraak en elke geleentheid wat sy kry, praat sy oor hom of is saam met hom. Bonita meen Shady gaan deur ’n fase, maar ondersteun haar susterskind so ver sy kan. Tog kan sy nie help om bang te voel dié ou gaan Shady seermaak nie,” sê Hildegardt.
Hul vriend Zee (Ray Neo Buso) is net so bekommerd soos Bonita oor Shady. “Shady en Jermaine is onafskeidbaar, daarom lug Zee as Shady se beste vriend sy kommer wanneer Shady feitlik geen tyd meer saam met haar vriende deurbring nie,” voeg Hildegardt by.
LOSKOP-STROOIMEISIE
Dis nie net Bonita en Zee wat bekommerd is oor Shady se houding nie. Khethiwe (Sesethu Ntombela), wat binnekort trou, is nie beïndruk met Shady, wat een van haar strooimeisies is, nie. Khethiwe voel Shady wil altyd die middelpunt van die aandag wees. Sesethu verduidelik: “Khethiwe is ’n aanstaande bruid en Shady is vasgevang in haar eie romanse. Khethiwe meen Shady kom nie haar pligte na nie.” En dan loop Shady ’n belangrike vergadering met Khethiwe mis en Khethiwe is woedend. Dit lyk asof Shady al die mense wat haar liefhet, vervreem. Hopelik kom sy tot haar sinne.
VERLEDE KEER
Die Hillsiders het vir die talentkompetisie voorberei, Fikani was gereed om tot die uiterste te gaan om sy plan te laat werk, en Shady het opwindende nuus gekry.
IN DIÉ UITGAWE
Die talentkompetisie is aan die gang, Karmen beïndruk die gehoor met haar goëlery, en Ivy lewer ’n sentimentele item. Alexa sukkel om vrede te maak met waar haar lewe is, Aggie is in die wolke ná ’n suksesvolle geleentheid, en Fikani stel Amorey gerus en nooi haar om tyd saam met Nelo deur te bring. Bonita is begaan oor die rigting wat Shady se lewe inslaan, Chris bel Fikani vir mediese hulp, en Lesedi is in ’n ongeluk betrokke. Khethiwe is woedend wanneer Shady nie vir ’n belangrike vergadering opdaag nie, Denzil vra
Chris oor Mariaan se doen en late, en Zee praat openhartig met Bonita oor sy kommer. Die jong mense kan nie die nuus glo wat hulle op die sosiale media lees nie, Tanya is ontmoedig deur mense se wreedheid, en Mariaan en DeWet weet nie waarheen om hulle te wend nie. Die Hillsiders is opgewek, Shady en Jermaine is tussen twee vure, en Ivy dring aan dat Romeo en Khethiwe se vriende ’n ram- en hennepartytjie vir die twee reël. Tjattas en Uys is oorbluf deur Zee se idee van ’n viering.