Ontmoet die De Wets
Wim, Rose en Nina is ’n hegte middelklas-gesin.
Wanneer die jong swemmer Nina de Wet (Reze-Tiana Wessels) die kampioenswemmer Karla
Swarts (Danielle Swanepoel), wat ook ’n lid is van Die Swart Marlyne-swemklub, ontmoet, word ’n hegte vriendskap gevorm, en Nina se ouers Wim (Neels van Jaarsveld) en Rose (Eloise Cupido) raak uiteraard ook by die swemklub se doen en late betrokke. Ons maak nader kennis met die De Wets.
WIM DE WET
Wim is ’n goedhartige en lojale ou en gee baie om vir sy medemens. “Wim se dogter, Nina, is sy alles. Sy ouers is geskei en hy wil graag ’n gesonde, gelukkige gesinseenheid hê en ’n goeie wederhelf en pa wees,” vertel Neels. “Wim is sjarmant, intelligent, het ’n goeie sin vir humor en stel sy gesin altyd eerste. Sy groothartigheid en vermoë om liefde te gee, is sy sterkste karaktereienskappe.
“Wim wil soms voorgee alles in sy gesin is perfek. Hy sukkel om die regte besluite te neem. Hy prioritiseer nie sy werk nie en dit laat sy vrou dink hy is lui. Hy hou nie van konfrontasie nie en ignoreer dikwels probleme omdat hy wil hê alles moet vreedsaam en harmonieus verloop. Wim wil hê sy vrou en dogter moet gelukkig wees, selfs wanneer hulle nie is nie,” sê Neels. “Wim voel soms minderwaardig; dat hy sy vrou en dogter in die steek gelaat het.”
ROSE DE WET
Rose hou van haar prokureurslewe, want sy het ’n passie vir mense en wil dié wat nie ’n stem het nie, help.
Rose is baie lief vir haar man en kind. “Eintlik is hulle ’n normale, gemiddelde middelklas-gesin. Hulle is lief vir die lewe en vir wat hulle doen. Die De Wets is ’n gesonde gesin op alle vlakke,” sê Eloise. Sy voeg by Rose is nie die tradisionele moederfiguur nie. “Sy is gedrewe in haar loopbaan, maar is nie altyd so betrokke by haar tienerdogter se lewe nie en wonder soms of al die opofferings ter wille van haar werk, die moeite werd is.”
NINA DE WET
Nina is nie ’n tipiese tiener nie, sê Reze-Tiana oor haar karakter. “Sy is lojaal, vriendelik, maar skaam en ’n regte daddy’s girl. Sy hou daarvan om mense om haar te hê, maar sukkel om te kommunikeer.” Nina is baie akademies georiënteerd. “Sy wil goed presteer in haar skoolwerk sodat sy ná matriek oorsee kan gaan studeer. “Sy kyk op na haar pa, maar het haar ma ook baie nodig.”
Reze-Tiara (25) sê: “Ons is beslis teenpole, want ek is ’n totale ekstrovert.” En met dié dinamika in die gesin gaan dinge beslis êrens verkeerd loop . . .
VERLEDE KEER
Die Swarts-familie was onkant gevang deur Gys se verrassing op sy 66ste verjaardag, Zelda het die skok van haar lewe gekry, en sy en tannie Bybie het via Sanet gehoor waar Meghan is.
IN DIÉ UITGAWE
Die interskole-swemgala is aan die gang, Nina en Karla ontmoet en kom dadelik oor die weg, en Sanet dink Karla doen nie haar beste in die swembad nie. Tannie Bybie kom kuier vir Meghan by haar nuwe huis, Zelda is in ’n slegte bui omdat Meghan haar in die rug gesteek het, en Johan en Tshepo het nie ooghare vir mekaar nie. Meghan stres oor die aand se familie-ete, Zelda se geskenk aan Gys en Meghan ontstel Meghan, en Henry is bang hy verloor sy werk nadat hy per ongeluk een van Gys se kosbare trofeë omstamp en breek. Gys sit Zelda op haar plek, Nina is steeds onseker of sy by Die Swart Marlyne moet aansluit, maar Karla probeer haar oortuig om wel deel van die span te word, en tannie Bybie en Meghan vind uit wat alles in die geheime tas onder Gys en Meghan se bed is. Gys kry die ideale fisioterapeut vir Die Swart Marlyne, Zelda voel al hoe sieker, en Tshepo kry ’n manier om sy en Henry se geldnood te verlig. Pam is verras om Arno by Die Swart Marlyne te sien, en Sanet kry ’n dosis van haar eie medisyne. Henry maan Tshepo om nie teen Johan resies te swem nie, maar Tshepo is vasberade om Johan op sy plek te sit, en Nina probeer steeds Johan se aandag trek.