Aap uit die mou
Zelda se groot geheim oor haar kanker onthul.
Die manipulerende Zelda (Sandi Schultz) wil heeltyd hê almal moet na haar pype dans. En die meeste van die tyd kry sy haar sin. Maar nou loop sy haar rieme styf. Sy steek al vir meer as ’n maand haar groot geheim, dat sy kanker het, vir die personeel by haar salon Skin Investment en selfs vir haar dogter, Pam (Tracey Lee Olivier), weg. Maar haar handlanger, vertroueling en katelknaap, Arno (Jean Henry), vind haar groot geheim uit – en sy weet wanneer die nuus oor haar kanker verder uitlek, kan dit ’n slegte nadraai hê. WOEDE EN FRUSTRASIE
Zelda is woedend wanneer Arno in haar lêers loer en afkom op ’n verslag van haar dokter, waarin haar diagnose bevestig word, sê Sandi. “Zelda wil nie hê ander mense moet van haar siekte weet nie. Sy word as ’n sterk en suksesvolle vrou in die gemeenskap gesien en boweal is sy baie trots,” voeg Sandi by.
Zelda se frustrasie neem toe wanneer Arno sonder haar medewete vir haar ’n afspraak by ’n ander dokter reël. “Sy is kwaad, want nou het hy reeds vir iemand anders vertel. Sy het gereeld kontak met haar dokter; en weier om na die ander dokter te gaan, want dit gaan wys sy is ’n swakkeling.” Eintlik is Zelda so ’n bietjie in ontkenning. “Sy glo sy is sterk en is nie veronderstel om siek te wees nie. Sy het gereeld pyn, maar probeer dit wegsteek, al begin almal om haar onraad vermoed. En dit maak haar natuurlik nóg knorriger en meer kort van draad.” SKOK EN KOMMER
Zelda sukkel al hoe meer om haar diagnose weg te steek. Sy weet nie hoe sy haar chemo-sessies vir haar personeel by die salon gaan verberg nie.
Wanneer Lydia (Rika Sennett), Sanet (Nadia Valvekens) en Anja (Reandi Grey) se ma aan kanker sterf, maak dit Zelda vreesbevange. “Zelda weet sy het mediese hulp nodig. Maar sy wil nie te veel oor haar siekte tob nie, want sy moet Gys (Justin Strydom) eers laat ondergaan,” sê Sandi oor haar karakter se vyand.
“Zelda wil sien Gys betaal vir wat in die verlede gebeur het.” Maar die uurglas loop leeg.