Binnelanders
Weekdae kykNET (*144) 19:30 Sepie
As ’n jong meisie het die smaakmaker (die nuwe Afrikaanse woord vir
social media influencer) Chané Grobler (22) in haar ouma se huis op die vloer gesit en elke weekdag om
19:30 Binnelanders gekyk. “Dis ’n ikoniese sepie waarvan almal weet. Ek het daarmee grootgeword en toe hulle my (vroeër vanjaar) vra om ’n self- tape te stuur vir ’n moontlike rol, was ek stomgeslaan en het dadelik gespring om iets vir hulle aanmekaar te slaan,” sê Chané wat 2,5 miljoen volgelinge op TikTok het.
Binnelanders se vervaardigers het so baie van Chané gehou, hulle het gesê sy hoef nie ’n nuwe karakter te speel nie, sy speel sommer haarself, Chané, wat in November ’n operasie by Binneland ondergaan. “Dit word deur ’n plastiese chirurg gedoen en het almal aan die gons,” sê Chané. “Verpleegster Bonnie (Antoinette Modise) herken my en kort voor lank klap haar tong soos sy vir almal vertel ek is in Binneland vir ’n nose
job, wat onwaar is,” sê Chané.
Oor presies watter prosedure Chané ondergaan en hoekom, is haar lippe geseël, maar Bonnie beland in die sop by dr. Annelize (Cindy Swanepoel) wat haar oor die vingers tik oor haar skinderstories. “Shame Bonnie voel baie sleg en probeer dinge regmaak met my, maar die manier hoe sy probeer jammer sê, boemerang,” vertel
Chané sonder om iets te verklap.
Chané se tyd by Binnelanders het haar laat dink sy wil dalk ’n aktrise word. “Die ervaring het my laat besef dis iets waarin ek belangstel en dit kan in my toekoms waar word,” sê sy.
Lees meer op ble. 20-23.